पिंपरी चिंचवडमध्ये दिवसेंदिवस गुन्हाचे प्रकार वाढत आहेत. गणपतीचे विसर्जन झाल्यानंतर बुधवारी मध्यरात्री दोनच्या सुमारास पुण्यातील बावधन परिसरात असलेल्या नर्सरीमध्ये एका व्यक्तीची हत्या झाल्याची माहिती समोर आली होती. त्यात आता नवीन अपडेट समोर आली आहे. पत्नीच्या अनैतिक संबंधातून संबंधित महिलेच्या पतीनेच तिच्या प्रियकराची हत्या केल्याचं समोर आलं आहे. आरोपीने बिहार येथून येऊन पुण्यात ही हत्या केली आहे.
प्रवीण कुमार असं हत्या केलेल्या मृत व्यक्तीचं नाव असून राजीव कुमार असं आरोपीचं नाव आहे. आरोपी हा बिहार येथील एका शाळेमध्ये शिक्षक असल्याचे देखील समोर आलं आहे. अनैतिक संबंधातूनच ही हत्या झाल्याचं उघड झालं आहे. हत्या केल्यानंतर आरोपी बिहारमध्ये येऊन आपल्या पत्नीचा देखील खून करणार होता, अशी शक्यता देखील पोलिसांनी वर्तवली आहे. पत्नीच्या प्रियकराची हत्या केल्यानंतर तो पलायन करण्याच्या तयारीत होता, त्याचवेळी दोघांना पोलिसांनी काही तासातच अटक केली आणि या प्रकरणाचा उलगडा झाला. पत्नीचे आणि तिच्या बॉयफ्रेंडचे फोटो व्हायरल झाल्यानंतर पतीने हे पाऊल उचललं आहे.
याबाबत पोलिसांनी दिलेल्या माहितीनुसार, आरोपी राजीव कुमार हा बिहारमध्ये शिक्षक आहे. राजीव कुमार आणि त्याच्या पत्नीची घटस्फोटासाठी कोर्टात केस सुरू आहे. या सर्व तणावातून जात असताना आपल्या पत्नीचे बॉयफ्रेंडसोबत व्हायरल झालेल्या फोटोंमुळे राजीव कुमार याच्या मनात प्रवीण कुमार याच्याबद्दल चीड निर्माण झाली होती. त्यावेळीच त्याने त्याची हत्या करण्याचं ठरवलं होतं. त्यानुसार राजीव कुमार हा पुण्यातील बावधानमध्ये आला होता.
प्रवीण कुमार काम करत असलेल्या बावधन येथील नर्सरीमध्ये आरोपी राजीव कुमार याने त्याची हत्या केली. आरोपी राजीव कुमार हा कौटुंबिक कलहामुळे तणावात होता. तसंच त्याची पत्नी गेल्या तीन- चार वर्षांपासून त्याच्या सोबत राहत नव्हती. त्यांची घटस्फोसाठी कोर्टात केस सुरू होती. अशातच पत्नीचे बॉयफ्रेंड प्रवीण कुमार सोबतचे फोटो व्हायरल होत होते. ते फोटो राजीव कुमार याच्यापर्यंत पोहचले होते. आधीच तणावात असलेल्या आरोपी राजीव कुमारने प्रवीण कुमारचा काटा काढण्याचं ठरवलं.
मृत प्रवीण कुमार हा त्याच्या भावाच्या पुण्यात असलेल्या नर्सरीत पार्टनर म्हणून काम करत होता. राजीव कुमारने त्याच ठिकाणी काम करणाऱ्या बिहार येथील तरुणाला सोबत घेऊन पुणे गाठलं. मंगळवारी मध्यरात्री दोनच्या सुमारास झोपेत असलेल्या प्रवीण कुमारच्या गळ्यावर धारदार शस्त्राने वार करून त्याची हत्या केली होती. हत्या केल्यानंतर शिक्षक असलेल्या राजीव कुमारने तेथून पळ काढला होता.
मात्र पोलिसांना माहिती मिल्यानंतर पोलिसांनी मुंबईच्या दिशेने बिहारकडे पळून जाण्याच्या तयारीत असलेल्या राजीव कुमार आणि त्याच्या साथीदाराला बेड्या ठोकल्या. राजीव कुमार हा बिहारमध्ये एका प्राथमिक शाळेत शिक्षक असल्याची माहिती पोलिसांकडून देण्यात आली आहे.