पलंगावर झोपलेली भाविका पुढच्या काही मिनिटांमध्ये एकाएकी गायब झाली. ही बाब लक्षात येताच कुटुंबियांच्या पायाखालची जमीन सरकली. भाविका बेपत्ता असल्याची बातमी गावात वाऱ्यासारखी पसरली. त्यानंतर एकच खळबळ उडाली. कुटुंबियांनी, नातेवाईकांनी गावभर फिरुन शोध घेतला. पण भाविकाचा थांगपत्ता लागला नाही. काहीतरी अघटित घडल्याची शंका आल्यानं कुटुंबियांना अश्रू अनावर झाले.
उत्तर प्रदेशच्या मेरठमध्ये तीन वर्षीय मुलीची हत्या करण्यात आली आहे. या हृदयद्रावक घटनेनंतर परिसरात हळहळ व्यक्त होत आहे. चिमुकली तिच्या मामाच्या लग्नासाठी आली होती. तिच्या मृत्यूनं लग्नघरावर दु:खाचा डोंगर कोसळला. चाकूनं भोसकून चिमुकलीची हत्या करण्यात आली. उत्तर प्रदेशच्या मेरठमधील भावनपूर पोलीस ठाण्याच्या हद्दीत ही धक्कादायक घटना घडली. चिमुकलीचा शोध रात्रभर घेण्यात आला. सकाळी तिचा मृतदेह स्मशानात सापडला.
लोहियानगरच्या सपनाचा विवाह गाझियाबादच्या साहनी चुंगी परिसरात राहणाऱ्या अमितशी झाला होता. सपनाचा भाऊ चमनचं लग्न ठरलं. त्यासाठी सपना आणि अमित त्यांच्या दोन मुलांना घेऊन माहेरी आली होती. भाविका आणि युग अशी तिच्या दोन मुलांची नावं आहेत. वरात दतावली गावात पोहोचली. सप्तपदी सुरु असताना चिमुकली भाविका झोपली. त्यावेळी सपना आणि अमित लग्नविधींमध्ये व्यग्र होते.
दुसऱ्या दिवशी सकाळी भाविकाचा मृतदेह स्मशानाजवळ सापडला. तिच्या मृतदेहाची अवस्था पाहून कुटुंबियांनी आक्रोश केला. भाविका रक्तबंबाळ अवस्थेत होती. तिच्या शरीरावर जखमांच्या अनेक खुणा होत्या. भाविकाची निर्घृणपणे हत्या करण्यात आली होती. तिची हत्या नेमकी कोणी केली, याचा शोध लागलेला नाही. या घटनेमुळे परिसरात खळबळ उडाली आहे.
तीन वर्षीय मुलीच्या हत्येची माहिती मिळताच मेरठचे एसएसपी विपीन ताडा फौजफाटा घेऊन घटनास्थळी पोहोचले. मुलीचा मृतदेह शवविच्छेदनासाठी पाठवला. पोलिसांनी या प्रकरणात तिघांना ताब्यात घेऊन त्यांची चौकशी सुरु केली आहे. फॉरेन्सिक पथकालाही पाचारण करण्यात आलं आहे. गुन्हेगाराला लवकरच बेड्या ठोकण्यात येतील, असा विश्वास पोलिसांनी व्यक्त केला आहे.