जिल्ह्यातील मुंबई-गोवा महामार्गावर कंटेनर चालक याने अचानक ब्रेक लावल्याने पाठून येणाऱ्या हुंडाई कारचा अपघात झाला आहे. चांढवे बुद्रुक येथे कंटनेर चालकाने अचानक ब्रेक लावल्याने पाठून येणाऱ्या हुंडाई कारची कंटेनरला जोरदार धडक लागली. या अपघातात चार जण जखमी झाले आहेत. तर कंटेनर चालक घटनास्थळावरून फरार झाला आहे. अपघातातील जखमींना प्राथमिक उपचाराकरिता सरकारी दवाखाना पोलादपूर येथे दाखल केले होते.
याबाबत सविस्तर माहिती अशी की, दि. २३ जून रोजी हुंडाई वेन्यू कार क्रमांक MH.04.LH.3387 वरील चालक राजाराम दत्तू कडू (वय ४०, रा. बदलापूर, जिल्हा ठाणे ) आणि सहप्रवासी निलेश हरिभाऊ शेलार (वय ३१, रा. टिटवाळा, जिल्हा ठाणे), राजकुमार गुलजारराम मल्ही (वय ५७, रा. कल्याण, जिल्हा ठाणे), प्रमोद महादेव खंडागळे (वय ३७, रा. माढा, जिल्हा सोलापूर) हे सावंतवाडी ते मुंबई असा प्रवास करत होते. चांढवे बुद्रुक तालुका महाड येथे त्यांची कार पोहचली त्यावेळी समोरील कंटेनर ने अचानक ब्रेक दाबल्याने, हुंडाई कारची कंटेनरला मागून धडक लागून अपघात झाला.
अपघात झाल्यानंतर कंटेनर चालक न थांबता तेथून पळून गेले. अपघातात हुंडाई वेन्यू कारचे मोठे नुकसान झाले आहे. तसेच कार मधील राजकुमार गुलजारराम मल्ही, राजाराम दत्तू कडू, निलेश हरिभाऊ शेलार,प्रमोद महादेव खंडागळे यांना किरकोळ दुखापत झाली आहे. अपघातातील जखमींना प्राथमिक उपचाराकरिता सरकारी दवाखाना पोलादपूर येथे दाखल केले होते. नंतर अधिक उपचाराकरिता त्यांना मुंबई येथे पाठवण्यात आले आहे, अशी माहिती महामार्ग पोलिस केंद्र निरीक्षक प्रवीण धडे यांनी दिली आहे.