मार्च महिन्याचे धान्य खरेदी करण्यासाठी शिधावाटप दुकानावर जाणाऱ्या लाभार्थ्यांना ‘मोदी सरकारची हमी, सर्वाना धान्य’ असा मजकूर आणि पंतप्रधान नरेंद्र मोदी यांचे छायाचित्र असलेल्या पिशव्यांचे वितरण केले जात आहे. पुढील पाच वर्षे मोफत धान्य वितरणाची हमी या पिशव्यांवरील मजकुरातून देण्यात आली आहे.
प्रधानमंत्री गरीब कल्याण योजनेअंतर्गत प्रत्येक शिधापत्रिका धारकाला दहा किलो वजनक्षमतेची एक ‘डी कट लॅमिनेटेड’ पिशवी वितरित केली जात आहे. अंत्योदय आणि प्राधान्य गटातील शिधापत्रिकाधारकांना या पिशव्या राज्यभरात वितरित केल्या जाणार आहेत. ई-पास प्रणालीद्वारे युद्धपातळीवर, शनिवार, रविवार आणि सुट्टीच्या दिवशीही या पिशव्यांचे वितरण करण्याचे आदेश अन्न, नागरी पुरवठा व ग्राहक संरक्षण विभागाने सर्व जिल्हा पुरवठा अधिकाऱ्यांना दिले आहेत.
पंतप्रधान गरीब कल्याण अन्न योजनेअंतर्गत अंत्योदय कुटुंबांना दरमहा ३५ किलो, तर प्राधान्य कुटुंबांना प्रतिव्यक्ती पाच किलो धान्य वितरण केले जात आहे. याच योजनेअंतर्गत पुढील पाच वर्षे ८० कोटी लाभार्थ्यांना मोफत धान्य दिले जाणार आहे. यासाठी केंद्र सरकार १२ लाख कोटी रुपये खर्च करणार आहे. ही मोदी सरकारची हमी असल्याचे धान्य वितरण पिशव्यांवर नमूद केले आहे. ‘‘पंतप्रधान गरीब कल्याण योजनेचा उद्देश एकच आहे- माझा कोणीही बंधू वा बहीण, माझा भारतवासी उपाशी राहू नये,’’ असा मजकूर आणि त्याखाली पंतप्रधान मोदी यांची स्वाक्षरी आहे.
अलिबागमध्ये मार्चचे धान्य वितरण करताना लाभार्थ्यांची ‘बायोमॅट्रीक’ ओळख पटवून या पिशव्यांचे वितरण केले जात आहे. प्राधान्य गट आणि अंत्योदय गटातील लाभार्थ्यांचा यात समावेश आहे. शिधावाटप दुकानदारांना या पिशव्यांचे तातडीने वितरण करण्याचे निर्देश देण्यात आले आहेत. जिल्हा पुरवठा विभागाकडून पिशव्यांच्या वितरणावर लक्ष्य ठेवले जाणार असून, वितरण योग्य प्रकारे होत आहे अथवा नाही याची पाहणी विशेष पथकांकडून केली जाणार असल्याचे शिधावाटप दुकानदारांनी सांगितले.
भाजपवर प्रचाराचा आरोप
लोकसभा निवडणुकीच्या तोंडावर शासकीय यंत्रणांच्या माध्यमातून भाजपने प्रचार सुरू केल्याचा आरोप केला जात आहे. यापूर्वी राज्य सरकारच्या वतीने गणेशोत्सव आणि दिवाळीत मुख्यमंत्री आणि उपमुख्यमंत्री यांची छायाचित्रे असलेल्या पिशव्यांमधून ‘आनंदाचा शिधा’ वितरण करण्यात आला होता. आता लोकसभा निवडणुकीच्या तोंडावर ‘मोदी सरकारची हमी’ असलेल्या पिशव्या घरोघरी पोहोचवण्याची दक्षता घेतली जात आहे.
शिधापत्रिका धारकांना
वितरित केल्या जाणाऱ्या पिशव्यांवर पंतप्रधान मोदी यांचे छायाचित्र, मोफत धान्य पुरवण्याची त्यांचा संदेश आणि त्याखाली त्यांची स्वाक्षरी आहे..
लाभार्थ्यांना तातडीने पिशव्या वितरण करा, असे निर्देश पुरवठा विभागाने दिले आहेत. त्यानुसार पिशव्यांचे वितरण करण्यात येत आहे. -प्रवीण रनावरे, रास्त भाव दुकान चालक
लोकसभा निवडणूक डोळय़ासमोर ठेऊन, शासकीय यंत्रणांना हाताशी धरून पिशव्यांच्या माध्यमातून भाजपने प्रचार सुरू केला आहे. लाभार्थ्यांना जबरदस्तीने बोलावून पिशव्या वितरित केल्या जात असून, हा सत्तेचा दुरूउपयोग आहे. – अजय उपाध्ये, तालुका अध्यक्ष, आप
रायगड जिल्ह्यात वितरणासाठी चार लाख ५६ हजार ७५३ पिशव्या प्राप्त झाल्या आहेत. शासनाच्या निर्देशानुसार त्यांचे वितरण सुरू केले आहे. – सर्जेराव सोनावणे, जिल्हा पुरवठा अधिकारी, रायगड.