विभक्त राहणाऱ्या पहिल्या पत्नीसोबत प्रेमविवाह करणाऱ्या ३८ वर्षीय तरुणावर पतीने प्राणघातक हल्ला केल्याची घटना गोवंडीच्या शिवाजी नगर परिसरात घडली. याबाबत शिवाजी नगर पोलिसांनी गुन्हा दाखल करून आरोपीला अटक केली.
हुसेन शेख असे आरोपीचे नाव असून तो गोवंडीच्या शिवाजी नगर परिसरात वास्तव्याला आहे. वर्षभरापूर्वी त्याने पहिल्या पत्नीला सोडून दुसरा विवाह केला होता. त्यामुळे त्याची पहिली पत्नी एकटीच विभक्त राहत होती. याचदरम्यान तिची युनूस शेख (३८) यांच्यासोबत ओळख झाली. ओळखीचे रूपांतर प्रेमात झाल्यानंतर दोघांनी लग्न केले. ही बाब हुसेनला समजताच तो प्रचंड संतापला.
युनूस सोमवारी रात्री गोवंडीच्या रफिक नगर परिसरातून जात असताना हुसेनने त्याला रस्त्यात गाठले. यावेळी दोघांमध्ये वाद झाला. त्यानंतर हुसेनने चाकूने युनूसवर अनेक वार केले. गंभीर अवस्थेत युनूस रस्त्यात पडला होता. अखेर काही नागरिकांनी त्याला गोवंडीतील शताब्दी रुग्णालयात दाखल केले. शताब्दी रुग्णालयातील अतिदक्षता विभागात युनूसवर उपचार सुरू आहेत. शिवाजी नगर पोलिसांनी याबाबत गुन्हा दाखल करून हुसेनला अटक केली.