प्रभु श्रीराम हे मांसाहारी असल्याचे वादग्रस्त विधान केल्यामुळे टिकेचे धनी ठरलेले राष्ट्रवादी (शरद पवार गट) चे आमदार जितेंद्र आव्हाड यांच्या समर्थकांनी आता रामाचा नारा देण्यास सुरूवात केली आहे. या समर्थकांकडून आव्हाड यांच्या मतदार संघातील कळवा परिसरात आठ हजार भगव्या झेंड्यांचे वाटप करण्यात आलेले असून हे झेंडे सर्वत्र लावण्यात आलेले आहेत. यामुळे कळवा परिसरात भगवामय झाल्याचे दिसून येत आहे. तसेच या राममय वातावरण निर्मीतीच्या माध्यमातून त्यांचे समर्थक आव्हाडांना धक्का देण्याच्या तयारीत तर नाही ना, अशीही चर्चा राजकीय वर्तुळात सुरू झाली आहे.
आयोध्या येथे २२ जानेवारीला राम मंदीर उद्घाटन आणि मुर्ती प्रतिष्ठापना होणार आहे. यानिमित्ताने विविध कार्यक्रमांच्या माध्यमातून सर्वत्र रामाचा जप सुरू झाला आहे. या कार्यक्रमाच्या आयोजनात भाजप, शिवसेना (शिंदे गट) आणि त्यांच्या पक्षाशी संबंधीत संस्था आघाडीवर असल्याचे दिसून येते. राम मंदीराच्या मुद्दयावरून राजकारण होत असल्याची टिका भाजपवर विरोधकांकडून केली जात आहे. असे असतानाच, प्रभु श्रीराम हे मांसाहारी असल्याचे विधान करून राष्ट्रवादी (शरद पवार गट) चे आमदार जितेंद्र आव्हाड यांनी वाद ओढावून घेतला होता. हा वाद काहीसा शमल्याचे चित्र असतानाच, आता आव्हाड समर्थकांनी रामाचा जप सुरू केल्याने अनेकांच्या भुवया उंचावल्या आहेत.
आव्हाड यांच्या समर्थकांनी कळवा परिसर भगवामय करत राम घराघरात पोहचविण्याचा प्रयत्न केला आहे. यानिमित्ताने टिकेनंतर आव्हाड समर्थकही रामाकडे वळल्याचे चित्र आहे. जितेंद्र आव्हाड यांच्या मतदार संघातील कळवा परिसरात त्यांच्या समर्थकांनी आठ हजार भगव्या झेंड्याचे वाटप केलेले आहे. या झेंड्यांवर रामाचे आणि मंदीराचे चित्र आहे. हे झेंडे परिसरातील रस्ते, इमारतींवर लावण्यात आलेले आहेत. ‘मन और घर मे जय श्रीराम’ या संकल्पनेतून हा उपक्रम राबविण्यात आल्याचे आव्हाड समर्थकांकडून सांगण्यात येत आहे. यानिमित्ताने आव्हाड समर्थकांना जनतेच्या मनातील ‘राम’ कळला असून यातूनच त्यांनी हा उपक्रम राबविल्याची चर्चा राजकीय वर्तुळात आहे.