भटक्या कुत्र्याच्या डोक्यात दगड घालून त्याला जबर जखमी केल्याची घटना कल्याण पूर्वेकडील पिसवली परिसरात घडली. ही घटना मोबाइल कॅमेऱ्यात कैद करण्यात आली आहे. काही नागरिकांनी त्याला विरोध केला, मात्र तरीही त्याने हे कृत्य केले. या हल्ल्यात जखमी झालेल्या श्वानाचा उपचारादरम्यान मृत्यू झाला. या प्रकरणी ओम प्रकाश सिंह याच्या विरोधात मानपाडा पोलिस ठाण्यात गुन्हा दाखल करून पोलिसांनी पुढील तपास सुरू केला आहे.
घटना मोबाइल कॅमेरात कैद
कल्याण पूर्व येथील मलंग रोड पिसवली परिसरात नाल्याजवळ बसलेल्या एका मादी जातीच्या भटक्या श्वानाच्या डोक्यात ओम प्रकाशने दगड घालून त्याला जबर जखमी केले. मारहाणीमुळे श्वान वेदनेने विव्हळत होती. ही संपूर्ण घटना मोबाइल कॅमेरात कैद झाली असून हा व्हिडिओ सोशल मीडियावर व्हायरल झाला आहे. यात ओम प्रकाशला आजूबाजूचे नागरिक हे कृत्य करण्यापासून रोखण्याचा प्रयत्न करताना दिसत आहेत, मात्र कोणाचेही न ऐकता ओमप्रकाश याने दोन मोठे दगड या कुत्र्याच्या डोक्यात घालून त्या मादी श्वानाला जबर जखमी केलेले दिसत आहे. प्राणिमित्रांनी या जखमी श्वानाला उपचारासाठी रुग्णालयात नेले, मात्र या श्वानाचा मृत्यू झाला.
याप्रकरणी ‘अलाईज फॉर ॲनिमल फाऊंडेशन’च्या सोनाली वाघमारे यांनी तात्काळ मानपाडा पोलिस ठाण्यात धाव घेत प्राणिमित्रांच्या मदतीने या श्वानाचा मृतदेह पोलिस ठाण्यात आणला. या निर्दयी व्यक्तीविरोधात गुन्हा दाखल करण्याची मागणी केली. मानपाडा पोलिसांनी या गंभीर घटनेची दखल घेऊन ओमप्रकाशविरोधात गुन्हा दाखल करून तपास सुरू केला आहे.