लोणावळा शहरातून एका धक्कदायक घटना समोर आली आहे. नीलकमल थीएटरसमोर असलेल्या एका दारुचा साठा असलेल्या गोडाऊनला आग लागल्याची घटना घडली आहे. या घटनेनं एकच धावपळ उडाली होती. या गोडाउनच्या शेजारी एक हॉस्पिटल देखील आहे. मात्र, अग्निशामक दलाने प्रसंगावधान राखत मोठी दुर्घटना टाळली आहे. या आगीत लाखोंची दारू जळल्याचा अंदाज व्यक्त केला जात आहे.
याबाबत अधिक माहिती अशी की, लोणावळा येथील मुख्य बाजारपेठेत दारुचा साठा असलेल्या गोडाऊन आहे. या गोडाऊनला आज पहाटेच्या सुमारास भीषण आग लागली. या आगीत लाखोंची दारू जळून खाक झाली आहे. या घटनेत सुदैवाने कोणतीही जीवितहानी झाली नाही. मात्र, लोणावळ्यातील वर्दळीच्या ठिकाणी असलेल्या एका बिल्डिंगच्या तळ मजल्यावर हे गोडाऊन आहे. या गोडाऊनच्या शेजारील एक भिंत सोडून हॉस्पिटल आहे. मात्र, प्रसंगावधान राखत अग्निशामक दलाने आग आटोक्यात आणली आणि मोठी दुर्घटना टळली.
घटनेची माहिती समजताच आग विझवण्यासाठी घटनास्थळी आयआरबी, लोणावळा नगरपरिषद तसेच आयएनएस शिवाजी येथील अग्निशमन दलाच्या गाड्या दाखल झाल्या होत्या. तब्बल तीन तासानंतर आग आटोक्यात आली आहे. तर आग लागलेल्या गोडाऊनच्या शेजारीच हॉस्पिटल असल्याने आग तातडीने आटोक्यात आणण्यासाठी अग्निशमन दलाने शर्थीचे प्रयत्न केले. या आगीने काही वेळ परिसरात धुराचे लोट निर्माण झाले होते.
आगीचे कारण अद्याप समोर आले नसून, शॉर्ट सर्किट झाल्याने ही आग लागली असावी असा अंदाज व्यक्त केला जात आहे. या आगीमध्ये लाखो रुपयांची दारू जळून खाक झाली आहे.