मुंबई विमानतळावर निळ्या रंगाच्या बॅगमध्ये बॉम्ब ठेवल्याचे टर्मिनल २ येथे दूरध्वनी करून एका व्यक्तीने सांगितले. त्यानंतर छत्रपती शिवाजी महाराज आंतरराष्ट्रीय विमानतळ आणि आसपासची सुरक्षा वाढवण्यात आली आहे. तपासणीत सुरक्षा कर्मचार्यांना विमानतळ परिसरात काही संशयास्पद आढळले नाही. दूरध्वनी करणाऱ्या व्यक्तीबाबत पोलीस अधिक माहिती मिळवत आहेत. पोलिस सूत्रांनी सांगितले की, शनिवारी संध्याकाळी ६ वाजता टी २ येथील अधिकाऱ्यांना एका निनावी दूरध्वनी आला.
गणेशोत्सव काळात कोणतीही अनुचित घटना घडू नये यासाठी खबरदारीचा उपाय म्हणून पोलिसांनी मोठ्या सार्वजनिक गणेश मंडळांसह, गर्दीची ठिकाणे, बाजारपेठा आणि संवेदनशील ठिकाणी साध्या वेशातील गस्तीसोबतच सीसी टीव्ही कॅमेरे, वॉच टॉवरच्या सहाय्याने करडी नजर ठेवली आहे. त्यातच या दूरध्वनीमुळे पोलीस यंत्रणेवर ताण पडला आहे. शहरात १५ उपायुक्त, दोन हजार पोलीस अधिकारी व ११ हजार कर्मचारी बंदोबस्तासाठी तैनात करण्यात आले आहेत. याशिवाय मेटल डिटेक्टर, श्वान पथक, बाॅम्ब शोधक व नाशक पथकांच्या माध्यमातूनही संवेदशील ठिकाणांची नियमित तपासणी करण्यात येत आहे.