मुंबईतील कुर्ला येथे झिकाचा दुसरा रुग्ण आढळला आहे. कुर्ला येथे राहणाऱ्या १५ वर्षीय मुलीला झिकाची लागण झाली असून तिला दीर्घकालीन इतर आजार आहेत. दरम्यान १९ जुलै रोजी मुंबईतील चेंबूरमध्ये झिकाचा पहिला रुग्ण सापडला होता. झिकाबाधित मुलीला २० ऑगस्टपासून ताप आणि डोकेदुखीचा त्रास होत होता. सुरुवातीला तिने खासगी रुग्णालयात उपचार घेतले.
सार्वजनिक रुग्णालयात ५ सप्टेंबर रोजी तिला दाखल करण्यात आले आहे. या मुलीला झिका झाल्याचे लक्षात आल्यावर मुंबई महापालिकेने ती राहत असलेल्या परिसरातील घरांचे सर्वेक्षण केले आहे. त्यात कोणताही नवीन संशयित रुग्ण किंवा तापाचा रुग्ण आढळला नाही. रुग्णाच्या इमारतीच्या परिसरात एडीज डासोत्पत्ती आढळली. तेथे डास नियंत्रण उपाययोजना राबविण्यात आली आहे.
झिका हा रोग हा झिका विषाणूमुळे होणारा सौम्य आजार आहे. हा आजार संक्रमित एडिस डासांमुळे पसरतो. एडिस डास डेंग्यू आणि चिकनगुनिया या आजारांचाही प्रसार करतात. हा आजार विषाणूजन्य असला तरी कोविड सारखा वेगाने पसरत नाही. झिका विषाणूची लागण झालेल्या व्यक्तींपैकी ८० टक्के व्यक्तींना लक्षणे नसतात. ज्यांना इतर आजार आहेत त्यांना गंभीर संक्रमण होण्याची शक्यता असते. अशा रुग्णाला रुग्णालयात दाखल करण्याची आवश्यकता भासू शकते.