पीसीएम, पीसीबी गटातून २८ विद्यार्थ्यांना शंभर पर्सेटाईल,एमएचटी-सीईटीचा निकाल

राज्य सामायिक प्रवेश परीक्षा कक्षातर्फे (सीईटी सेल) विविध पदवी-पदव्युत्तर अभ्यासक्रमांच्या प्रवेशासाठी सीईटी घेतल्या जातात. राज्यात ९ ते १३ मेदरम्यान ‘पीसीएम’ आणि १५ ते २० मेपर्यंत ‘पीसीबी’ गटाची सीईटी परीक्षा घेण्यात आली. राज्य सीईटी कक्षामार्फत ३६ जिल्ह्यांच्या ठिकाणी १९७ परीक्षा केंद्रांवर ही परीक्षा घेण्यात आली. त्यापैकी १८१ केंद्रे राज्यात आणि १६ केंद्रे राज्याबाहेर होती.

एमएचटी-सीईटीच्या परीक्षेसाठी एकूण ६ लाख ३६ हजार ८९ विद्यार्थ्यांनी नोंदणी केली होती. त्यातील ५ लाख ९१ हजार १३० विद्यार्थ्यांनी परीक्षा दिली. त्यापैकी पीसीएम गटासाठी ३ लाख ३३ हजार ४१ विद्यार्थ्यांनी नोंदणी केली होती आणि ३ लाख १३ हजार ७३० विद्यार्थ्यांनी परीक्षा दिली. पीसीबी गटासाठी ३ लाख ३ हजार ४८ विद्यार्थ्यांनी नोंदणी केली आणि २ लाख ७७ हजार ४०० विद्यार्थ्यांनी परीक्षा दिली. पीसीएम आणि पीसीबी गटातून एकूण ३ लाख २९ हजार ८९ विद्यार्थी आणि २ लाख ६२ हजार ४१ विद्यार्थिनींनी परीक्षा दिली.

केंद्रीय प्रवेश प्रक्रिया १५ जूनपासून

विद्यार्थ्यांना गुरुवारी १५ जूनपासून केंद्रीय प्रवेश प्रक्रियेसाठी (कॅप) अर्ज करता येणार आहे. त्यासाठी सीईटी सेलकडून एक डिजिटल अॅप उपलब्ध करून देण्यात येणार आहे. विद्यार्थ्यांना विषयानुसार गुण, क्रमांक आणि पर्सेटाईल www. mahacet. org ,www. mahacet. in या अधिकृत संकेतस्थळावर पाहता येतील. बी.ई, बी.टेकसाठी जवळपास १ लाख ४३ हजार ४१३, एम.ई, एम.टेकसाठी १२ हजार ३१६, बी.फार्मसीसाठी ३६ हजार २२८, एमबीए/एमएमएससाठी ४४ हजार ४७७, तीन वर्षीय विधी अभ्यासक्रमासाठी १८ हजार ४२५ आणि ५ वर्षीय विधी अभ्यासक्रमासाठी ११ हजार ८८३ जागा उपलब्ध आहेत.