मनसेच्या वतीने मनसे नेते अविनाश जाधव यांच्या नेतृत्वाखाली बुधवारी ठाणे शहरातील नालेसफाईचा दौरा आखण्यात आला होता. मात्र, त्याठिकाणी पाहणी करण्यासाठी गेले असता तेथील स्थानिक महिलांनी जाधव यांच्यावर प्रश्नांचा भडिमार केला.”नुसते इथं येऊ नका काम पण करा”असे म्हणत जाधव यांना टोले हाणले. यावर जाधव यांनी “ज्यांना मतदान करता त्यांना सांगा, आम्ही निवडून न येताही इथे येतोय” असा पवित्रा घेत महिलांना उत्तर दिलं. त्यानंतर अविनाश जाधवांनी आपला पाहणी दौरा आटोपता घेतला. त्यामुळे मनसेच्या या फसलेल्या दौऱ्याची ठाण्यात सर्वत्र चर्चा रंगली आहे.
ठाणे महानगर पालिका क्षेत्रात पावसाळ्यापूर्वीची कामं मोठ्या प्रमाणात सुरू आहेत. तसेच ठाणे महानगर पालिका क्षेत्रात नाले सफाईची काम मोठ्या युद्ध पातळीवर सुरू आहेत.नालेसफाईचे काम मोठ्या प्रमाणात झाले असल्याचा दावा महापालिकेकडून केला गेला होता. या नाल्यांचा आढावा घेत थेट मुख्यमंत्र्यांनी ठाण्यातील नालेसफाईची पाहणी देखील केली होती. दुसरीकडे विरोधी पक्षातील नेतेही नालेसफाईची पोलखोल करण्यासाठी नाल्यांची पाहणी करताना पाहायला मिळत आहेत. अशीच नालेसफाईची पाहणी करण्याकरिता बुधवारी ३१ मे रोजी मनसेचे नेते आणि मनसेचे ठाणे पालघर जिल्हाअध्यक्ष अविनाश जाधव हे ठाण्यातील घोडबंदर रोड परिसरातील डोंगरीपाडा येथे गेले होते.
नालेसफाईची पाहणी करून झाल्यानंतर अविनाश जाधव हे परिसरातील पाणी टंचाईचा आढावा घेण्यासाठी गेले असता, स्थानिकांनी अविनाश जाधव यांना खडेबोल सुनावत “नुसते इथे येऊ नका, काही काम पण करा. २००९ पासून आम्ही इथेच आहोत, नुसते येऊ येऊ करताय.. तुमच्या सोबत आम्ही मानपड्याला फिरलोय” असे सुनावले. मात्र, यावर अविनाश जाधव यांनी “ज्यांना मतदान करता त्यांना सांगा” असं म्हणत “आम्ही निवडून न येताही इथे येतोय” असा पवित्रा घेत महिलांना उत्तर दिलं. त्यानंतर जाधव यांनी पाहणी दौरा आटोपता घेतला.