धुळे जिल्ह्यातील शिरपूर तालुक्यातील शिंगावे शिवारात काल सायंकाळी विजेचा शॉक लागल्याने एका युवकाचा मृत्यू झाल्याची दुर्दैवी घटना घडली आहे. आपल्या घराचे बांधकाम चालू असताना त्या बांधकामावर पाणी मारतांना विजेचा जोरदार झटका लागल्याने २६ वर्षीय सौरभ जयवंतराव बागुल याचा दुर्दैवी मृत्यू झाला.
शिरपूर येथील शिंगावे शिवारात असलेल्या दौलतनगर मागे एका कॉलनीत सौरभ बागुल याचे स्वतःच्या घराचे बांधकाम चालू आहे. या बांधकामावर पाणी मारण्यासाठी सायंकाळच्या सुमारास इलेक्ट्रिक मोटर सुरू करायला गेलेल्या सौरभला यावेळी त्याला अचानक विजेचा जोरदार धक्का बसला आणि या धक्यात सौरभचा जागीच मृत्यू झाला.
गेल्या काही महिन्यापूर्वीच जयवंतराव गुलाबराव बागुल (रा. बहादूरपूर ता. पारोळा, हल्ली मुक्काम पाटीलवाडा, मारुती मंदिर, शिंगावे शिरपूर) यांनी आपल्या नवीन घराच्या बांधकामाला सुरूवात केली होती. नवीन घराच्या बांधकामाला पाणी मारण्यासाठी त्यांचा एकुलता एक मुलगा सौरभ उर्फ सोनू जयवंतराव बागुल हा जात होता. काल देखील तो नियमितपणे घराच्या बांधकामावर पाणी मारत असताना त्याला इलेक्ट्रीक मोटरचा शॉक लागला. तातडीने त्याला परिसरातील नागरिकांच्या मदतीने सुरुवातीला शिरपूर येथील नगरपालिकेच्या `इंदिरा गांधी मेमोरियल हॉस्पिटलला दाखल करण्यात आले. त्यानंतर येथील उपजिल्हा रुग्णालयात दाखल करण्यात आले, मात्र डॉ. दिव्या तवर यांनी तपासून त्यास मृत घोषित केले.
विजेचा जोरदार धक्का बसल्याने सौरभ खूप दूरवर फेकला गेला होता. या दुर्दैवी घटनेत सौरभचा मृत्यू झाल्याने सर्वत्र एकच खळबळ उडाली. सौरभच्या पश्चात आई, वडील आणि बहीण असा परिवार असून ऐन मातृदिनीच एकुलत्या एक सौरभच्या दुर्दैवी मृत्यूमुळे त्याच्या आईला खूप मोठा धक्का बसला आहे. या घटनेनं परिसरात हळहळ व्यक्त केली जात आहे. सौरभ हा अत्यंत हुशार आणि मनमिळाऊ असल्यामुळे त्याच्या या मृत्यूची माहिती मिळताच शिंगावे शिवारात असलेल्या त्याच्या घरी मित्रांसह नातेवाईकांनी गर्दी केली होती.