या प्रकरणी अल्पवयीन मुलीने मार्केटयार्ड पोलीस स्टेशनमध्ये तक्रार दाखल केली आहे. पीडितेच्या तक्रारीनंतर पोलिसांनी अभिजीत दिलीप पापळ (वय २१, रा. अप्पर इंदिरानगर, पुणे) या नराधमाला अटक केली आहे. त्याच्यावर कलम ३७६ (२), (के) (एन), ३५४ (ड) आणि बालकांच्या लैंगिक अपराधापासून संरक्षण अधिनियम कलम चार – आठ आणि १४ अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, पीडिता ही मार्केटयार्ड परिसरात राहते. ती एका नामांकित महाविद्यालयात शिक्षण घेते. कॉलेजला जाण्यासाठी ती रोज बसने जायची. बस थांब्यावरच पीडितेची आणि अभिजीतची ओळख झाली. या ओळखीचा गैरफायदा घेत नराधम अभिजीत पापळने अल्पवयीन तरुणीला जीवे मारण्याची धमकी आणि कॉलेज बंद करण्याची धमकी देत वारंवार बलात्कार केला. डिसेंबर २०२२ ते फेब्रुवारी २०२३ दरम्यान हा सगळा प्रकार घडला आहे.
दरम्यान, भूगाव येथील एका लॉजवर घेऊन जात अभिजीत पापळ याने पीडितेच्या इच्छेविरुद्ध तिच्यासोबत लैंगिक संबंध प्रस्तापित केले. त्यानंतर, याविषयी कुठे वाच्यता केल्यास ठार मारण्याची धमकी देखील दिली. त्यामुळे तरुणी ही पोलीस स्टेशनमध्ये तक्रार देण्यास घाबरत होती. मात्र, अखेर हिम्मत करून तरुणीने तक्रार दाखल केल्यानंतर पोलिसांनी नराधम आरोपीला बेड्या ठोकल्या आहेत. या प्रकरणी मार्केटयार्ड पोलीस पुढील तपास करत आहेत.