जुनी पेन्शन योजना लागू करा या मागणीसाठी रायगड जिल्ह्यातील शासकीय कर्मचारी आजपासून संपावर जाणार आहेत. त्यामुळे शासकीय कार्यालयातील कामकाज ठप्प झाले आहे. शाळा आणि आरोग्य यंत्रणेवरही संपाचा परिणाम झाला आहे.
अलिबाग येथील जिल्हाधिकारी कार्यालय, तहसील कार्यालय, जिल्हा परिषद, पंचायत समिती, नगरपालिका विभागातील कर्मचारी संपात सहभागी झाले आहेत. त्यामुळे शासकीय कार्यालयात शुकशुकाट पहायला मिळत आहे. कामकाज ठप्प झाले असून कर्मचारी संघटना आक्रमक झाल्याचे पहायला मिळत आहे.
जिल्ह्यातील १५ हजार कर्मचारी आणि शिक्षक या संपात सहभागी झाल्याचा दावा कर्मचारी संघटनांनी केला आहे. संपात राज्य सरकारी कर्मचारी, निम सरकारी, जिल्हा परिषद, शिक्षक व शिक्षकेतर कर्मचारी, महानगर पालिका, नगर पालिका, नगर पंचायतमधील कर्मचारी व शिक्षक संघटना सहभागी झाल्या आहेत. महाराष्ट्र शासनाने दिनांक १ नोव्हेंबर २००५ पासून शासकीय सेवेत येणाऱ्या कर्मचाऱ्यांना नविन राष्ट्रीय पेन्शन योजना (एनपीएस) लागू केली आहे. ही योजना अन्यायकारक असून सर्वांना जुनी परिभाषित पेन्शन योजना लागू करावी, या मागणीसाठी राज्य सरकारी कर्मचारी मध्यवर्ती संघटना सातत्याने विविध आंदोलन करीत आहेत.
संघटनांच्यावतीने अलिबाग येथील जिल्हाधिकारी कार्यालयावर मोर्चाचे आयोजन करण्यात आले असून, त्यानंतर कर्मचारी निदर्शने करणार आहेत, थोड्याच वेळात या मोर्चाला सुरवात होणार आहे.
