दुचाकीचे लर्निंग लायसन्स काढून देण्यासाठी लाच घेणाऱ्या एका आरटीओ एजंटला ठाणे लाचलुचपत प्रतिबंधक विभागाने (एसीबी) गुरुवारी रंगेहात पकडले. कामरान फैजुद्दीन शेख असे या एजंटचे नाव आहे. त्याच्याविरुद्ध वागळे इस्टेट पोलिस ठाण्यात गुन्हा दाखल झाला आहे.
दुचाकीचे लर्निंग लायसन्स काढण्यासाठी शासकीय शुल्क २०१ रुपये असताना शेख याने तक्रारदाराकडे ३ हजारांची लाच मागितली. याबाबत एसीबीकडे तक्रार आल्यानंतर एसीबीच्या अधिकाऱ्यांनी याविषयी अगोदर पडताळणी केली. पडताळणीमध्ये शेख याने तक्रारदाराकडे लाचेली मागणी केल्याचे स्पष्ट झाले. एकूण २ हजार ८०० रुपायांच्या लाचेच्या रकमेपैकी १ हजार ३०० रुपये आधी आणि उर्वरीत १ हजार ५०० रुपये ३० दिवसानंतर स्वीकारण्याचे त्याने मान्य केले. गुरुवारी सायंकाळी ठाण्यातील पूर्व द्रुतगती मार्गालगत मर्फी येथील आरटीओच्या कार्यालयाजवळ एसीबीने सापळा लावून शेख याला तक्रारदाराकडून १ हजार ३०० रुपायांची लाच स्वीकारताना रंगेहात पकडले.