अखिल भारतीय अंधश्रद्धा निर्मूलन समितीचे संस्थापक आणि सहअध्यक्ष श्याम मानव यांना ठार मारण्याची धमकी देण्याची घटना ताजी असताना आता पुण्यातून त्यांच्या घरावर बॉम्ब टाकून त्यांना ठार मारण्याची धमकी देण्यात आली आहे. याप्रकरणी हिंजवडी पोलीस ठाण्यामध्ये गुन्हा दाखल करण्यात आला आहे. श्याम मानव यांच्या मुलाच्या मोबाईल क्रमांकावर हा धमकीचा मेसेज आला आहे.
श्याम मानव यांचा मुलगा पिंपरी चिंचवड बावधन परिसरामध्ये आलेला होता. त्यावेळी त्यांना हा मेसेज आला. या प्रकरणी सूर्यप्रताप नावाच्या एका व्यक्ती विरोधात गुन्हा दाखल करण्यात आला आहे.
याबाबत पोलिसांनी दिलेली माहिती अशी की, मध्य प्रदेशातील बागेश्वर धामच्या पंडित धरेंद्र शास्त्री महाराज यांना श्याम मानव यांनी दिलेल्या आव्हानाच्या पार्श्वभूमीवर या धमकीकडे गांभीर्याने पाहिले जात असून श्याम मानव यांना जीवे ठार मारण्याची धमकी आली आहे. तसेच, घरावर बॉम्ब टाकण्याची धमकी आल्यानंतर शाम मानव यांच्या सुरक्षेमध्ये वाय दर्जाची वाढ करण्यात आली आहे.
२६ जानेवारीच्या पार्श्वभूमीवर ही घटना घडल्याने श्याम मानव यांच्या सुरक्षेमध्ये वाढ करण्यात आली असून मोठी पोलिसांकडून मोठा बंदोबस्त देखील वाढवण्यात आला आहे. श्याम मानव हे फक्त हिंदू धर्माच्या विरोधात बोलून हिंदू धर्माला बदनाम करतात. त्यांनी धिरेंद्र कृष्ण महाराज यांची पोलखोल केली नाही. फक्त हिंदू धर्माला बदनाम करण्यासाठी सभेचा वापर केला, असा आरोप तरुणांकडून करण्यात आला होता.