करोनाचा फायदा घेत २०२०मध्ये करोना केंद्राच्या ३२ व्या मजल्यावरून पोबारा करणारा कुख्यात आरोपी गाझी नारा इराणी उर्फ जाफरी उर्फ सय्यद याला खडकपाडा पोलिसांनी २२ जानेवारीला सापळा रचून अटक केली. अटकेसाठी त्याच्याच घरात दबा धरून बसलेल्या पोलिसांवर या आरोपीने मिरची स्प्रे मारून पळून जाण्याचा प्रयत्न केला, मात्र पोलिसांनी त्याला पळून जाण्याची संधी न देता बेड्या ठोकल्याची माहिती कल्याण परिमंडळ ३ चे पोलिस उपायुक्त सचिन गुंजाळ यांनी दिली. सोनसाखळी चोरी, मोटर सायकल चोरी यांसारखे गुन्हे करत त्याने पोलिसांना जेरीस आणले होते.
खडकपाडा पोलिस ठाण्याच्या हद्दीतून मोटर सायकल चोरणारा आरोपी मोहने लहुजीनगर परिसरात राहत असल्याची माहिती खडकपाडा पोलिसांनी मिळाली होती. या माहितीच्या आधारे सहाय्यक पोलिस निरीक्षक अनिल गायकवाड यांच्या पथकाने त्याच्या घरातच सापळा रचला. मध्यरात्री घरात आलेल्या गाझी याला पकडले गेल्याची जाणीव होताच त्याने पोलिसांवर मिरची स्प्रेचा मारा केला. यामुळे चार पोलिसांच्या डोळ्याला इजा झाली, मात्र प्रसंगावधान राखत उरलेल्या दोघांनी त्याला ताब्यात घेतले.
हा आरोपी २०२०मध्ये कोनगाव पोलिसांच्या हाती लागला होता, मात्र त्याला करोना झाल्याने टाटा आमंत्रा करोना केअर केंद्राच्या ३२ व्या माळ्यावर ठेवण्यात आले होते. ही संधी साधत त्याने मागच्या बाजूच्या पाईपवरून उतरून पोबारा केला होता. चार गुन्ह्यांत मोक्काअंतर्गत पोलिसांनी कारवाई केली, मात्र मागील अनेक वर्षे तो फरार होता. त्याच्या अटकेनंतर अप्पर पोलिस आयुक्तांनी पोलिस पथकाला ३५ हजार रुपयांचे बक्षीस देत कौतुक केले. त्याच्याकडून पोलिसांनी तीन दुचाक्या, कुकरी, चॉपर, एअरगन, मिरची स्प्रे असा ऐवज जप्त केला आहे. त्याच्यावर अन्य पोलिस ठाण्यांत १२ गुन्हे दाखल असल्याची माहिती उपायुक्त गुंजाळ यांनी दिली.
इराणी टोळीत गैरइराणी साथीदार
मागील अनेक वर्षांत इराणी चोरटे आपल्याच वस्तीतील मुलांना सोबत घेऊन चोऱ्या करत होते. यातील अनेक चोरांना मोक्काअंतर्गत अटक करण्यात आल्यानंतर त्यांनी इतर समाजातील मुलांना चोरीच्या मार्गाला लावले आहे. गाझाबरोबर अनेक गुन्ह्यांत असलेला त्याचा साथीदार जयकुमार राठोड याला पोलिसांनी यापूर्वीच अटक केली. त्याच्याकडून ४३ ग्राम सोने जप्त करण्यात आले आहे. इराणी चोरट्यांचे आणखी तीन साथीदार गैरइराणी असल्याचे उपायुक्त गुंजाळ यांनी सांगितले.