वावीहर्ष (ता. त्र्यंबकेश्वर) येथील वीस वर्षीय तरुणाने आपल्या गावालगतच्या बोराच्या झाडावर गळफास घेत शुक्रवारी (दि. २०) आत्महत्या केली. प्रकाश संजय बांगारे असे या तरुणाचे नाव आहे.
इगतपुरी तालुक्यातील मुंढेगाव शिवारातील एका वाडीतील अविवाहित युवती जिल्हा सामान्य रुग्णालयात उपचार घेत असताना ती गर्भवती असल्याची धक्कादायक बाब समोर आली. या युवतीने फिर्याद दिल्याने प्रकाश बांगारे याच्याविरोधात बलात्काराचा गुन्हा दाखल होणार होता. मात्र, त्यापूर्वीच त्याने आत्महत्या केली आहे.
मुंढेगाव शिवारातील एका वाडीतील युवती वावीहर्ष येथे तिच्या बहिणीच्या घरी गेली होती. चार महिन्यांपूर्वी तेथील प्रकाशने आपल्यावर शारीरिक अत्याचार केल्याची बाब पीडितेने घोटी पोलिसांत दिलेल्या तक्रारीत नमूद केली आहे. दरम्यान, तिच्यावर जिल्हा शासकीय रुग्णालयात उपचार सुरू असून ती गर्भवती असल्याचे समोर आले आहे. पीडितेच्या फिर्यादीवरून घोटी पोलिसात शनिवारी संशयित प्रकाशविरोधात कलम ३७६ प्रमाणे गुन्हा दाखल झाला आहे.
बलात्कार प्रकरणी गुन्हा दाखल होण्यापूर्वी संशयित प्रकाशने शुक्रवारी आपल्या गावालगतच्या बोरीच्या झाडाला गळफास घेऊन आपली जीवनयात्रा संपविली. दरम्यान, या दोन्ही घटनांबाबत घोटी पोलिस ठाण्यात नोंद झाली आहे. घोटीच्या सहायक निरीक्षक श्रद्धा गंधास, पोलिस कॉन्स्टेबल पंकज दराडे, सुहास गोसावी हे पुढील तपास करीत आहेत.
आत्महत्या करण्यापूर्वी प्रकाशने चिठ्ठी लिहून ठेवल्याचे समजते. ‘पीडित युवतीच्या प्रकरणाशी माझा काहीही संबंध नाही. तिची डीएनए चाचणी केल्यास सगळे स्पष्ट होईल. बाबा, तुम्ही आईला त्रास देऊ नका, काळजी घ्या’, असे त्याने चिठ्ठीत लिहून ठेवल्याचे समजते.