सराफी दुकानांमध्ये ग्राहक म्हणून जाऊन सोन्या-चांदीचे दागिने चोरणाऱ्या दोन महिलांना गुन्हे शाखा युनिट दोनच्या पथकाने अटक केली. दोन्ही महिला सराईत गुन्हेगार असून, त्यांनी या पूर्वीही अशा प्रकारचे गुन्हे केले आहेत. त्यांच्याकडून ४० हजार रुपये किमतीचे ४५० ग्रॅम चांदीचे दागिने जप्त करण्यात आले आहेत.
उषा दत्ता रिटे (वय ४५) आणि संगीता प्रकाश रिटे (वय ५०, रा. विठ्ठलनगर, वारजे) अशी अटक करण्यात आलेल्या महिलांची नावे आहेत. दोघींनी मिळून शहरातील अनेक सराफांना गंडा घातला आहे. सराफी दुकानांमधून सोन्या-चांदीचे दागिने चोरी झाल्याच्या अनेक घटना घडत आहेत. या पार्श्वभूमीवर गस्तीवर असताना पथकाला या महिलांची माहिती मिळाली. त्यानुसार सापळा रचून नटराज हॉटेल परिसरातून दोघींना ताब्यात घेतले. दुकानातील सीसीटीव्ही कॅमेऱ्याच्या चित्रीकरणाच्या आधारे महिलांची ओळख पटविण्यात आली. वरिष्ठ पोलिस निरीक्षक क्रांतिकुमार पाटील, पोलिस उपनिरीक्षक नितीन कांबळे, अंमलदार उज्ज्वल मोकाशी, गजानन सोनूने यांच्या पथकाने ही कारवाई केली.