उल्हासनगरमध्ये टाडा आरोपी पप्पू कलानी याचा मुलगा ओमी कलानी याच्यावर ५० लाखांची खंडणी मागितल्याप्रकरणी गुन्हा दाखल करण्यात आला आहे. खंडणी नाही तर इमारत पाडण्याची धमकी व्यापारी धीरेंद्र राजेश वधारिया यांना देण्यात आली होती. ओमी कलानी याने या प्रकरणाला खोटे असल्याचे सांगत हे प्रकरण पुढे नेणार असल्याचे म्हटले.
मुंबईला लागून असलेल्या उल्हासनगर येथील बिल्डर राजेश वधारिया यांना दिलेल्या धमकीमध्ये, पैसे न दिल्यास त्यांची इमारत पाडण्यात येईल, असे सांगण्यात आले होते. उल्हासनगर पोलिस ठाण्यात नोंदवलेल्या वृत्तानुसार, दोन दिवसांपूर्वी ओमी कलानी यांनी व्यापारी धीरेंद्र राजेश वधारिया यांना त्यांच्या श्री कृष्णा कॉम्प्लेक्समधील तीन दुकानांसाठी नोटीस बजावली होती. त्यानंतर एका अज्ञात व्यक्तीने राजेश वधारिया यांच्या घरी जाऊन वधारिया यांचा मुलगा धीरेंद्र राजेश वधारिया यांना धमकी दिली. वधारिया यांनी दिलेल्या माहितीनुसार,”तो ओमी कलानीच्या कार्यालयात आला आहे आणि तू जाऊन तुझ्या वडिलांना सांग की ओमी कलानीला ५० लाख रुपये द्या नाहीतर त्यांची इमारत पाडली जाईल”. याप्रकरणी धीरेंद्र वधारिया यांनी ओमी कलानी व त्या अज्ञात व्यक्तीविरुद्ध स्थानिक पोलीस ठाण्यात गुन्हा दाखल केला आहे.