मेळघाट व्याघ्र प्रकल्पातील सेमाडोह वनपरिक्षेत्रांतर्गत असेरी बीटमधील वन खंड क्रमांक १६९ मध्ये चार ते पाच वर्षे वयाचा नर बिबट आणि दीड ते दोन वर्षे वयाची मादी बिबट वेगवेगळय़ा ठिकाणी मृतावस्थेत आढळून आल्याने खळबळ उडाली आहे.
शवविच्छेदनादरम्यान या बिबटय़ांच्या मृत्यूचे कारण स्पष्ट होऊ शकले नाही. मृत बिबटय़ांचे सर्व अवयव शाबूत असून त्यांच्या शरीरावर कुठलीही जखम आढळून आली नाही. या बिबटय़ांचा मृत्यू साप चावल्याने किंवा एखाद्या अज्ञात आजाराने व शारीरिक अंतर्गत दुखापतीने झाला असण्याची शक्यता वर्तवली जात आहे. याशिवाय विषप्रयोगाची शक्यताही नाकारली जाऊ शकत नाही, असे सांगण्यात आले आहे. मृतावस्थेत आढळून आलेल्या दोन बिबटय़ांच्या पार्थिवावर सेमाडोह येथील जिल्हा परिषद शाळेचे मुख्याध्यापक अतुल प्रभाकरराव कडू आणि वन अधिकाऱ्यांच्या उपस्थितीत अग्निसंस्कार पार पडले.