पुण्यातील एका प्रतिष्ठित शाळेत एका अनोळखी व्यक्तीने ११ वर्षांच्या मुलीवर शाळेच्या स्वच्छ्तागृहात बलात्कार केल्याचा धक्कादायक प्रकार समोर आला आहे. ही घटना बुधवारी सकाळी अकरा ते साडेअकरा या दरम्यान घडली. येरवडा येथील शाळेत शिरून एकतर्फी प्रेमातून दहावीतील मुलीवर खुनी हल्ला करण्याची घटना ताजी असतानाच हा प्रकार समोर आल्यामुळे खळबळ उडाली आहे. या प्रकरणी पीडित मुलीच्या आईने शिवाजीनगर पोलिस ठाण्यात तक्रार दिली आहे. त्यानुसार अनोळखी व्यक्तीवर गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार यांची ११ वर्षांची मुलगी जंगली महाराज रस्त्यावरील शाळेत शिकायला आहे. बुधवारी (२३ मार्च) सकाळी ती शाळेत गेली. त्यावेळी एक अनोळखी व्यक्ती शाळेत आली. त्याने तक्रारदार यांच्या मुलीची ओळख असल्याचा बहाणा करून तिला ढकलत ढकलत शाळेच्या स्वच्छ्तागृहात नेले. त्यानंतर त्याने तिच्यावर लैंगिक अत्याचार केला. “कोणाला काही सांगितले तर बघ,” अशी धमकी देऊन तेथून निघून गेला.
या घटनेनंतर घाबरलेल्या मुलीने तिच्या मैत्रिणीला हा सर्व प्रकार सांगितला. त्यांनी शाळेतील शिक्षिकांना याची माहिती दिली. त्यांनी तातडीने मुलीच्या आईला आणि पोलिसांना शाळेत बोलावून घेऊन घडलेला प्रकार सांगितला. दरम्यान, या प्रकाराची माहिती मिळताच पोलिस उपायुक्त प्रियंका नारनवरे यांच्यासह वरिष्ठ अधिकार्‍यांनी शाळेला धाव घेतली. शिवाजीनगर पोलिस ठाण्यातील उपनिरीक्षक मनिषा जाधव याचा तपास करत आहेत.
”शाळेत सीसीटीव्ही आहेत. त्याचा तपास केला जात आहे. शाळेत कार्यरत असलेल्या कोणा पुरुषाचे हे काम नाही ना, याची तपासणी आम्ही केली आहे. हा आरोपी बाहेरचा असल्याचे आतापर्यंतच्या तपासात दिसून आले आहे.” – अनिता मोरे, वरिष्ठ निरीक्षक शिवाजीनगर पोलिस ठाणे.