ऊसतोडणीसाठी शेतात गेलेल्या एक महिलेचा सडलेला मृतदेह गळफास लावलेल्या अवस्थेत झाडावर लोंबकळत असल्याची घटना गडहिंग्लज तालुक्यातील हसूरचंपू येथे आढळली. हा मृतदेह एक महिन्यापूर्वीचा असावा असा अंदाज पोलिसांनी व्यक्त केला आहे. हा मृतदेह शवविच्छेदनासाठी पाठवण्यात आला आहे.सध्या ऊस हंगाम अंतिम टप्प्यात असून हसूरचंपू येथील रावजी चिटणीस यांच्या उसाची तोड आली होती. त्यांचे शेत गावापासून अंदाजे एक किलोमीटर अंतरावर आहे. ऊस तोडणीसाठी चिटणीस सकाळी शेतात गेले असता त्यांना शेतातील कडुनिंबाच्या झाडाला साडीने गळफास लावलेल्या अवस्थेतील मृतदेह निदर्शनास आला. त्यांनी पोलिसांना घटना कळवली. घटनास्थळी पोलिस आल्यावर त्यांनी लटकलेल्या मृतदेहाची तपासणी केली. मृतदेह पूर्ण सडलेला होता. फक्त छातीचा भाग शिल्लक होता. मृतदेहावर असलेल्या कपड्यावरून महिलेचा मृतदेह असून तिचा मृत्यू एक ते सव्वा महिन्यापूर्वी झाला असावा असा अंदाज पोलिसांनी व्यक्त केला आहे. शवविच्छेदनानंतरच मृत्यूचे कारण व अन्य बाबी स्पष्ट होऊ शकतील, असे पोलिसांनी सांगितले. तसेच बेपत्ता व्यक्तींची पोलिस माहिती घेत आहेत.