चमक गेलेले दागिने स्वस्तात पॉलिश करून देतो असे सांगून मुलुंडमध्ये एका सोसायटीमध्ये राहणाऱ्या महिलेचे सोन्याचे दागिने आणि घरातील रोख रक्कम दोन चोरट्यांनी पळवल्याची घटना उघड झाली आहे. महिलेच्या तक्रारीवरून या दोन व्यक्तींविरोधात मुलुंड पोलिसांनी गुन्हा दाखल करण्यात आला आहे.
मुलुंडच्या पश्चिमेकडील गणेश गावडे रोडवरील एका गृहनिर्माण सोसायटीमध्ये गेल्या आठवड्यात दोन तरुण शिरले. त्यांनी या इमारतीमध्ये राहणाऱ्या दीपाली (बदललेले नाव) यांच्या घराचा दरवाजा ठोठावला. दीपाली यांचे पती कामानिमित्त बाहेर गेले होते, तर मुलगा व्यायामशाळेत गेल्याने त्या एकट्याच घरी होत्या. आवाज झाल्याने दीपाली उठल्या आणि त्यांनी दरवाजा उघडला. दरवाजात उभ्या असलेल्या दोघांची नजर दीपाली यांच्या हातातील सोन्याच्या बांगड्यांवर नजर गेली. आम्ही स्वस्तात दागिने पॉलिश करून देतो, असे सांगून त्यांनी दीपाली यांना बांगड्या काढायला लावल्या. पावडरने बांगड्या पॉलिश करताना त्यांना कानातली सोन्याची बुटीदेखील काढायला सांगितली. दोन्ही दागिने घेतल्यानंतर त्यांनी दीपाली यांच्याकडे पाणी मागितले.
दीपाली यांचा विश्वास बसल्याचे पाहून दोघेही निर्धास्त झाले. यापैकी एकाने काही सुट्या पैशांची मागणी दीपाली यांच्याकडे केली. कपाटातील ४० हजार रुपये काढून दीपाली सुटे पैसे देत असताना, या दोघांनी हातचलाखी करून सर्व रक्कम काढून घेतली. रोकड आणि दागिने हाती लागल्यानंतर त्यांनी पुन्हा पाणी मागितले. दीपाली या पाणी आणण्यासाठी आत जाताच दोघेही सोसायटीमधून पसार झाले. बाहेर आलेल्या दीपाली दरवाजात कुणी नाही, हे पाहून इमारतीमधून खाली आल्या. आजुबाजूच्या परिसरात त्यांनी दोन तरुणांचा शोध घेतला. परंतु ते कुठेच दिसले नाहीत.
मास्कमुळे चेहरा ओळखण्यात अडचणी
ही घटना दीपाली यांनी पतीला सांगितल्यानंतर त्यांनी मुलुंड पोलिस ठाण्यात तक्रार केली. सोन्याच्या चार बांगड्या आणि कानातील बुटी असे साधारण ५० हजार रुपयांचे दागिने आणि ४० हजारांची रोकड एवढा ऐवज या चोरट्यांनी लांबवला. दोघांच्या तोंडावर मास्क होता, त्यामुळे त्यांना ओळखणेही मुश्किल आहे.