जव्हार तालुक्यातील झाप पैकी मनमोहाडी गावातील गरोदर महिलेला ८ ऑगस्ट रोजी सकाळी नऊ वाजेच्या सुमारास अचानक कळा येऊ लागल्याने त्या कुटुंबाची धावपळ उडाली. अखेर ग्रामस्थांनी त्या गरोदर मातेला झोळीत बांधून जवळपास सात ते आठ किमी. डोंगर चढून पायी प्रवास करीत झाप येथील आरोग्य उपकेंद्र येथे प्राथमिक उपचारासाठी दाखल केले, परंतु तेथे पुरेशा सुविधा उपलब्ध नव्हती. त्यामुळे तिला जव्हार येथील उपजिल्हा रुग्णालयात हलविण्यात आले. सरकारची ‘आरोग्य यंत्रणा तुमच्या दारी’ ही संकल्पना नेमकी कुठे अस्तित्वात आहे, असा प्रश्न उपस्थित झाला आहे.
गरोदरपणात नातेवाइकांकडे
मनमोहाडी गावातील गरोदर माता, महिलेची प्रसूतीची वेळ जवळ आली की कुटुंबाची धावपळ होण्याआधी गरोदर महिलांना तालुक्याच्या ठिकाणी नातेवाइकांकडे येऊन थांबावे लागते.
ग्रामस्थांकडून रस्त्याचे काम
पावसामुळे रस्त्यावर डोंगर दरीतील दगड, झाडे पडून रस्त्याची पायवाट झाली होती, त्यामुळे पायी चालण्यासाठीसुद्धा मोठी कसरत करावी लागत होती, मात्र बांधकाम विभागाची मदतीची वाट न पहाता त्या गावातील नागरिकांनी एकत्र येऊन श्रमदानातून रस्त्याचे काम करून त्यांनी रस्ता मोकळा करून घेतला.
जोपर्यंत रस्ता होत नाही, तोपर्यंत आम्ही कायम प्रयत्नशील आहोत, अनेक वेळा शासनाकडे पत्रव्यवहार केले आहेत, परंतु आमच्या भागातील गरोदर माता व रुग्णांचे हाल संपणार तरी कधी?
– एकनाथ दरोडा, ग्रामसदस्य, झाप