एका गर्भवती महिलेने आपल्याच मुलीची हत्या केल्याची घटना समोर आली आहे. याप्रकरणी विरार पोलिस ठाण्यात हत्येचा गुन्हा दाखल करण्यात आला असून, सदर महिलेला पोलिसांनी ताब्यात घेतले आहे.
विरार पूर्व, फुलपाडा परिसरातील पारिजात अपार्टमेंटमध्ये सोनुकुमार सोनी (३२) हा पत्नी नेहासह (२२) राहतो. या दोघांना नानसी (२) आणि आणखी एक वर्षाची मुलगी आहे. त्यातच नेहा सात महिन्यांची गर्भवतीदेखील आहे. शनिवारी नानसी घरात खेळताना अचानक बेशुद्ध पडल्याचे नेहाने सांगितले. त्यानंतर तिला रुग्णालयात दाखल केले असता तिचा मृत्यू झाल्याचे सांगण्यात आले. मात्र अंत्यसंस्कार होण्याआधी स्थानिकांनी या घटनेबाबत पोलिसांना कळवले. पोलिसांनी नानसीचा मृतदेह शवविच्छेदनासाठी पाठविल्यानंतर तिच्या पोटाला व डोक्याला दुखापत झाल्याने मृत्यू झाल्याचे समोर आले. पोलिसांना याबाबत संशय आल्याने नेहाची कसून चौकशी केली. यात तिने नानसीला जोरात मारल्याने ती दरवाजावर आपटल्याचे सांगितले. हा सर्व प्रकार शनिवारी घडला. मात्र शवविच्छेदनाचा अहवाल सोमवारी आल्यानंतर उशिराने हत्येचा गुन्हा दाखल केल्याचे विरार पोलिस ठाण्याचे वरिष्ठ पोलिस निरीक्षक सुरेश वराडे यांनी सांगितले.