मोबाइलवर बोलत पायी चालत निघालेल्या एका महिला वकिलाच्या हातातील मोबाइल खेचणाऱ्या दोन तरुणांना ठाणे नगर पोलिसांनी अटक केले असून त्यांच्याकडून १६ मोबाइल आणि दोन दुचाकी जप्त करण्यात आल्या आहेत. चौकशीमध्ये ठाण्यातील सहा मोबाइल चोरीचे गुन्हे उघडकीस आले आहेत. विशेष म्हणजे, या तरुणांनी फूड डिलिव्हरी करणाऱ्या एका कंपनीमध्ये कामाला असून कामासाठी दुचाकीची आवश्यकता असल्याचे घरात खोटे सांगितले. दुचाकींची खरेदी करून ते गुन्हे करू लागले, ही बाब चौकशीमध्ये निष्पन्न झाली आहे.
ठाण्यातील गावंडबाग परिसरात राहणाऱ्या अॅड. रुपाली अकोलकर ह्या २२ जुलै रोजी दुपारी सिव्हिल रुग्णालय येथून फोनवर बोलत चालत निघाल्या होत्या. त्यावेळी दुचाकीवरून आलेल्या चोराने रुपाली यांच्या हातातील मोबाइल खेचला ते उथळसरच्या दिशेने पळून गेले. त्यांच्या तक्रारीनंतर ठाणेनगर पोलिस ठाण्यात गुन्हा दाखल करण्यात आला. सीसीटीव्ही फुटेजच्या आधारे आरोपी भिवंडीतील अशोकनगर भागातील असल्याची माहिती मिळाली. त्यानंतर सापळा लावून हेमंत थानवी आणि सागर यादव या दोन तरुणांना दुचाकीसह शिताफीने अटक केले. या दोघांकडून १६ मोबाइल फोन आणि दोन दुचाक्या जप्त करण्यात आली. मोबाइल आणि दुचाकी यांची एकूण किंमत ४ लाख १० हजार ३०० असल्याची माहिती पोलिसांनी दिली. आरोपींच्या चौकशीमध्ये ठाणेनगर पोलिस ठाण्यातील दोन, नौपाडा पोलिस ठाण्यातील तीन आणि राबोडी पोलिस ठाण्यातील एक अशा एकूण सहा गुन्ह्यांची उकल झाली आहे.
चोरलेल्या मोबाइलची विक्री करण्यासाठी आरोपी बनावट बिल बनवून देत असल्याचेही चौकशीमध्ये निष्पन्न झाले आहे. आरोपींना अटक करण्याची कामगिरी वरिष्ठ पोलिस निरीक्षक रामराव सोमवंशी, पोलिस निरीक्षक (गुन्हे) बाबासाहेब निकम यांच्या मार्गदर्शनाखाली पोलिस उप निरीक्षक सचिन बाराते, पोलिस हवालदार गणेश पोळ यांच्या पथकाने केली.