देशभरात करोना संक्रमणाविरुद्ध लढण्यासाठी लसीकरण मोहीम सुरू आहे. याच दरम्यान बिहारमधून एक धक्कादायक प्रकार समोर आलाय. आरोग्य विभागाचा बेजबाबदारपणा या घटनेतून स्पष्टपणे समोर आलाय.एका वयस्कर व्यक्तीला नियमाप्रमाणे दोन नाही तर करोना लसीचे चार डोस देण्यात आल्याचं समोर आलंय. भोजपूर जिल्ह्याताली सहार प्रखंडमध्ये ही घटना घडलीय.
ही घटना समोर आल्यानंतर आरोग्य विभागात एकच खळबळ उडालीय. या प्रकरणाची चौकशी सुरू करण्यात आलीय.
कोलोडीहरी गावचे ७६ वर्षीय रहिवासी रामदुलार सिंह यांच्यासोबत ही घटना घडलीय. त्यांना करोना लसीचे चार डोस देण्यात आले आहेत. मिळालेल्या माहितीनुसार, रामदुलार सिंह यांना पहिला डोस २३ फेब्रुवारी रोजी आमहरुआ आरोग्य केंद्रावर देण्यात आला होता. १८ एप्रिल रोजी त्यांना दुसरा डोस देण्यात आला.
त्यानंतर, सहार प्राथमिक आरोग्य केंद्रावर २३ मार्च रोजी त्यांना तिसरा आणि १६ जून रोजी कोव्हिशिल्डचा चौथा डोस देण्यात आला. रामदुलार सिंह यांनी केलेल्या दाव्याप्रमाणे आतापर्यंत त्यांनी करोना लसीचे चार डोस घेतलेले आहेत.आरोग्य विभागाकडून मात्र अद्याप या प्रकाराबद्दल कोणतीही अधिकृत माहिती देण्यात आलेली नाही. प्रकरणाचा तपास पूर्ण झाल्यानंतर याबद्दल अधिक माहिती देण्यात येईल, असं आरोग्य विभागाकडून सांगण्यात येतंय. तांत्रिकी कारणामुळे ही गफलत झाली असू शकते असं आरोग्य प्रबंधक संजीव कुमार यांनी म्हटलंय.
मात्र, एकाच व्यक्तीला चार डोस देण्यात आल्याचं समोर आल्यानंतर नागरिकांनाही मोठा धक्का बसलाय. तर देशातील कित्येकांना अद्याप पहिला डोसही मिळालेला नसताना एकाच व्यक्तीला चार डोस देण्यावरूनही काही जणांनी आरोग्य विभागावर निशाणा साधलाय. चौकशीनंतर या प्रकारातील आणखी तथ्य समोर येण्याची चिन्हं आहेत.