गेल्या दीड वर्षांपासून सुरू असलेल्या करोनाच्या लढाईमध्ये संरक्षण मिळविण्यासाठी ठाणे जिल्ह्यातील केवळ ७ टक्के नागरिकांनाच करोनालशीच्या दोन्ही मात्रा घेण्यात यश आले आहे. ठाणे जिल्ह्यातील एकूण ९९ लाख ४२ हजार ४०७ लोकसंख्येपैकी केवळ ६ लाख ७६ हजार २२८ नागरिकांनी दोन्ही मात्रा घेतल्याचे अहवालामधून स्पष्ट झाले आहे. गेल्या सात महिन्यांत लशींच्या तुटवडा आणि राजकीय हस्तक्षेपामुळे जिल्ह्यात केवळ ७ टक्केच लसीकरण झाल्याचे यावरून अधोरेखित होत आहे.
ठाण्यामध्ये जानेवारीपासून लसीकरण मोहिमेला सुरुवात झाली. सुरुवातीला या लसीकरण मोहिमेला थंड प्रतिसाद होता. मात्र, दुसऱ्या लाटेची तीव्रता पाहून जिल्ह्यातील नागरिकांनी लस घेण्याबाबत गांभीर्य दाखवले. त्यानंतर लसीकरणासाठी केंद्रांवर रांगा लागल्या. मात्र, लशीच्या तुटवड्यामुळे या मोहिमेला खीळ बसली आहे. जुलै महिन्यात तर केवळ चार वेळा ठाण्याला लशींचा पुरवठा झाला. ठाणे जिल्ह्याची लोकसंख्या ९९ लाख ४२ हजार ४०७ आहे. यापैकी लस घेतलेल्यांची संख्या २४ लाख ०६ हजार २१८ आहे. मात्र, यातील केवळ ६ लाख ७६ हजार २२८ जणांनीच दोन्ही मात्रा घेत लसीकरण पूर्ण केले आहे.
तिसऱ्या लाटेची धास्ती घेतल्यामुळे अनेक ठाणेकर लस घेण्यासाठी धडपडत आहेत. पण केंद्रावर चार-सहा तास रांगे उभे राहूनही अनेकवेळा लस मिळत नसल्याचे नागरिक सांगतात. कल्याण- डोंबिवलीमध्येही लस घेण्यासाठी पहाटे ३ वाजल्यापासून रांगा लावत असल्याची परिस्थिती आहे. ठाण्यात जुलै महिन्यात पावणेतीन लाखांहून अधिक लशींचा पुरवठा करण्यात आला आहे. यामध्ये दोन दिवसांपूर्वीच दीड लाख लशींचा पुरवठा झाला आहे.
ठाणे, नवी मुंबई आघाडीवर
ठाणे जिल्ह्यातील सर्वाधिक लसीकरण झालेल्यांमध्ये ठाणे महापालिका आणि नवी मुंबई पालिकेचा समावेश असल्याचे आकडेवारीवरून स्पष्ट होत आहे. यामध्ये इतर पालिकेच्या तुलनेत दुसरा मात्रा घेतलेल्यांची संख्या सर्वाधिक आहे. ठाणे पालिकेत ही संख्या १ लाख ७० हजार ६२६, तर नवी मुंबईत १ लाख ५५ हजार ९१९ आहे. सर्वांत कमी लसीकरण उल्हासनगरमध्ये झालेले आहे.
शहरनिहाय लसीकरण
शहर दुसरी मात्रा घेतलेले
ठाणे शहर १,७०,६२६
कल्याण-डोंबिवली १,१७,७२४
उल्हासनगर २०,३३८
भिवंडी २५,९६८
मिरा भाईंदर १,१६,३७४
नवी मुंबई १,५५,९१९
ठाणे ग्रामीण १,०९,६४१
एकूण ७,१६,५९०