ठाणे महापालिकेच्या ग्लोबल कोविड रुग्णालयामधील एका माजी महिला कर्मचाऱ्याचा विनयभंग केल्याच्या आरोपाखाली बुधवारी महापालिकेचे उपायुक्त विश्वनाथ केळकर यांच्याविरुद्ध कापूरबावडी पोलिस ठाण्यात गुन्हा दाखल करण्यात आला आहे. मात्र, हे आरोप धांदात खोटे असून दुष्ट हेतून आरोप केले आहेत. या संपूर्ण प्रकरणाबाबत विशाखा समितीची चौकशी सुरू आहे. या चौकशीमधून सत्य बाहेर येईल असे केळकर यांनी सांगितले.
ग्लोबल रुग्णालयात पीडित महिला नर्स या पदावर काम करत होती. नंतर या महिलेला बढतीदेखील मिळाली. मात्र, रुग्णालयात काम करत असताना उपायुक्त विश्वनाथ केळकर यांनी आपला विनयभंग केल्याची पीडित महिलेची तक्रार हे. याबाबत महिलेने विशाखा समितीकडे तक्रार केली होती. परंतु तिची तक्रार दाखल करून घेण्यास पोलिसांकडून टाळाटाळ होत असल्याने याबाबत बुधवारी भाजपच्या प्रदेश उपाध्यक्षा चित्रा वाघ यांनी पोलिस आयुक्तांची भेट घेतली होती. त्यानंतर पोलिस आयुक्तांनी तत्काळ एफआयआर दाखल केला जाईल, असे आश्वासन दिल्याचे वाघ यांनी पत्रकार परिषदेत सांगितले होते. त्यानंतर उपायुक्त केळकर यांच्याविरुद्ध तातडीने कापूरबावडी पोलिस ठाण्यात विनयभंगाचा गुन्हा दाखल झाला. या प्रकरणाचा तपास महिला पोलिस अधिकाऱ्याकडे सोपवण्यात आला असून याबाबत पोलिसांकडून चौकशी करण्यात येत आहे.