कंत्राटी सफाई कामगाराचा मृत्यू झाल्यानंतर त्याची ३ महिने हजेरी दाखवून त्याचे वेतन काढले जात असल्याचा धक्कादायक प्रकार पनवेल महापालिकेत समोर आला आहे. या प्रकरणी पनवेल महापालिकेची दिशाभूल करणाऱ्या घनकचरा व्यवस्थापनाच्या ठेकेदारावर महापालिकेकडून कोणतीही कारवाई करण्यात आली नाही. केवळ वेतनाची रक्कम वसूल करून ठेकेदाराच्या चुकीवर महापालिकेने पांघरुण घातले आहे
पनवेल महापालिकेची संबंधित ठेकेदाराकडून फसवणूक होत असताना वेतनाची मंजुरी देणाऱ्या ठेकेदाराच्या हजेरी बुकाची आरोग्य अधिकाऱ्यांनी पाहणी का केली नाही, मृत कामगाराची हजेरी लावली जात असताना हा प्रकार कोणाच्याही पाहण्यात कसा आला नाही की आरोग्य विभागाने ठेकेदाराची पाठराखण केली, असे प्रश्न उपस्थित झाले आहेत. विशेष म्हणजे बँक खात्यात पगार जमा झाल्यानंतर पगाराची रक्कमदेखील काढून घेण्यात आली आहे. ही रक्कम कोणी काढून घेतली याबाबत मला माहिती नसल्याचे मृत कामगार शेळके यांच्या पत्नीने सांगितले.
हा प्रकार लक्षात आल्यानंतर पनवेल महापालिकेच्या प्रशासनाने जानेवारीमध्ये या ठेकेदाराकडून एकूण वेतनाची ७५ हजार रुपये रक्कम बिलातून वजा केली. मात्र महापालिकेच्या डोळ्यात धुळफेक करणाऱ्या ठेकेदारावर कारवाई करावी असे महापालिकेच्या आरोग्य विभागाला वाटले नाही. हा प्रकार नजरचुकीने घडल्याची कबुली ठेकेदाराने दिली आहे. आझाद कामगार संघटनेने महापालिकेला पत्र देऊन या प्रकाराबाबत आरोग्य अधिकारी शैलेश गायकवाड यांना निलंबित करून साईगणेश एंटरप्रायझेसचे सुपरवायझर राकेश भुजबळ यांच्यावर गुन्हे दाखल करण्याची मागणी केली आहे.
एकत्रित हजेरीमुळे…
महापालिकेत सुमारे १,३०० कंत्राटी सफाई कामगार काम करतात. सर्वांची हजेरी एकत्रित येते, कोणाचीही वैयक्तिक हजेरी येत नाही. या मृत कामगाराच्या मुलाला कामावर घेतले आहे. अनेकदा तांत्रिक अडचणींमुळे कंत्राटी कामगारांची बायोमेट्रिक हजेरी नोंदवली जात नाही. डिसेंबरमध्ये हा प्रकार उघड झाल्यानंतर आधी दिलेल्या वेतनाची रक्कम वसूल करण्यात आली आहे, अशी माहिती अधिकाऱ्यांनी दिली.