नेरुळ पोलिस ठाण्यातील पोलिस शिपाई संतोष गोपाळ राठोड (३१) यांच्या डोक्यात पाच तरुणांनी बियरच्या बाटल्या फोडून तसेच, त्याना लाथाबुक्क्यांनी बेदम मारहाण करून पलायन केल्याची खळबळजनक घटना रविवारी रात्री पावणेबारा वाजण्याच्या सुमारास नेरुळमधील बालाजी टेकडी परिसरात घडली. राठोड हे गंभीर जखमी झाले असून त्यांना उपचारार्थ बेलापूर येथील अपोलो हॉस्पिटलमध्ये दाखल करण्यात आले आहे. नेरुळ पोलिसांनी पाच अज्ञात तरुणांवर प्राणघातक हल्ला केल्याप्रकरणी गुन्हा दाखल करून त्यातील दोघांना ताब्यात घेतले आहे.राठोड हे रविवारी रात्री बालाजी टेकडी परिसरात कर्तव्यावर होते. टेकडीवरील चर्चजवळच्या उतारावर पाच तरुण हुल्लडबाजी करत असल्याचे राठोड यांच्या निर्दशनास आले. ते त्या ठिकाणी गेले असता या तरुणांकडे नंबर नसलेली स्कूटी असल्याचे दिसून आले. या हुल्लडबाज तरुणांना हटकल्यानंतर त्यांनी राठोड यांच्याशी हुज्जत घातली. राठोड यांनी बिट मार्शलना फोन बोलावून घेतले. या गोष्टीचा राग आल्याने त्यांनी राठोड यांना मारहाण केली. तसेच, त्यांच्या डोक्यावर व तोंडावर बियरच्या बाटल्या मारल्या व तेथून पलायन केले. त्यानंतर तेथे दाखल झालेल्या बिट मार्शलनी राठोड यांना रुग्णालयात दाखल केले.
राठोड यांच्या चेहऱ्यावर १५ टाके पडले आहेत. या मारहाणीत राठोड त्यांच्या नाकाजवळची व मेंदूला रक्तपुरवठा करणारी नस फाटल्याने मोठ्या प्रमाणात रक्तस्ताव झाला. त्यामुळे राठोड यांच्यावर शस्त्रक्रिया करण्यात येणार असल्याचे असल्याचे पोलिसांनी सांगितले.