शैक्षणिक पात्रतेमुळं वादात अडकलेल्या केंद्रीय मनुष्यबळ विकासमंत्री स्मृती ईराणी त्यांच्या सरकारी लेटरहेडमुळं पुन्हा चर्चेच्या केंद्रस्थानी आल्या आहेत. ईराणी यांनी देशातील शिक्षकांना पत्रं पाठवण्यासाठी वापरलेल्या लेटरहेडमध्ये व्याकरणाच्या अनेक चुका आढळून आल्या आहेत. ही संधी साधून सोशल मीडियानं पुन्हा एकदा ईराणी यांची खिल्ली उडवली आहे.
ईराणी यांनी विद्यार्थ्यांच्या उत्तम प्रगतीबद्दल देशातील शिक्षकांचे आभार मानणारे पत्र लिहिले आहे. मात्र, त्या पत्राच्या लेटरहेडमध्ये ‘मिनिस्टर’ शब्दाचे इंग्रजी स्पेलिंग चुकीचे लिहिण्यात आलेले आहे. तसंच ‘संसाधन’ हा हिंदी शब्द ‘संसाधान’ असा लिहिण्यात आलाय. त्यामुळं सोशल मीडियानं पुन्हा एकदा ईराणी यांच्या शैक्षणिक पात्रतेकडं बोट दाखवलं आहे. मात्र, ईराणी यांनी हे लेटरहेड आपले नव्हतेच असा खुलासा केला आहे. स्वत:च नाव हिंदीत लिहिताना माझ्याकडून कधीच चूक होणार नाही. आपल्या विभागातील जबाबदार अधिकाऱ्यांना या चुकीचं स्पष्टीकरण देण्याचे आदेश दिले आहेत, असं त्यांनी ट्विटरवरून स्पष्ट केलं आहे.