द्वारका परिसरातील ट्रॅक्टर हाऊस येथील उड्डाणपुलावर सोमवारी सायंकाळी साडेपाच वाजेच्या सुमारास ही घटना घडली होती. भारती जाधव या सिध्दीविनायक टाऊनशिप, साईनगर, अमृतधाम येथील रहिवासी होत्या. सातपूर एमआयडीसीत एका कंपनीतील काम संपवून त्या घराकडे परतत असताना ही घटना घडली. ट्रॅक्टर हाऊस येथे त्यांच्या गळ्याला तुटून आलेल्या नायलॉन मांजाचा फास पडला. धारदार मांजामुळे गळा चिरला गेला. यामुळे त्या दुचाकीवरून खाली पडल्या. साधारणत: दहा मिनिटे त्या तिथेच पडून होत्या. रक्तबंबाळ झालेल्या महिलेची अवस्था पाहून रस्त्याने जाणाऱ्या येणाऱ्या नागरिकांनी त्यांना तातडीने सिव्हिल रुग्णालयात दाखल केले. मात्र उपचार सुरू करण्यापूर्वी त्यांचा मृत्यू झाला होता. दरम्यान, माहिती मिळाल्यानंतर भद्रकाली पोलिसांनी घटनास्थळी धाव घेतली.
बंदी असणाऱ्या प्राणघातक नायलॉन मांजाचा गळ्याभोवती फास पडल्याने झालेल्या दुर्घटनेत गळा चिरून एका महिलेस सोमवारी प्राण गमवावे लागले होते. या घटनेत मयत महिला भारती मारुती जाधव (४६) यांचा मृतदेह शासनाकडून आर्थिक मदत मिळाल्याशिवाय ताब्यात घेण्यास त्यांच्या नातेवाईकांनी नकार दिल्याने काही वेळ तणावाचे वातावरण निर्माण झाले होते. मात्र, घटनास्थळी प्रशासनाच्या वतीने तहसिलदारांनी त्यांच्या नातेवाईकांशी संवाद साधत मुख्यमंत्री सहाय्यता निधीद्वारे जाधव यांच्या कुटुंबास मदत मिळवून देण्याचे आश्वासन दिल्यानंतर नातेवाईकांनी जाधव यांचा मृतदेह ताब्यात घेत अंत्यसंस्कार केले.