दुकानात नोकरासमोर वारंवार अपमान करणे तसेच इच्छेविरुद्ध दुकानाचे कामकाज करत असल्याच्या रागातून लहान भावाने दुकानातील नोकरांच्या मदतीने मोठ्या भावाची हत्या केल्याचा धक्कादायक प्रकार ठाणे पूर्वेकडील कोपरी भागात घडला. कोपरी पोलिसांनी शुक्रवारी रात्री उशिरा मुख्य आरोपीसह तिघांना अटक केली आहे.
महेश चावला (४८) आणि अनिल चावला (४५) हे दोघेही सख्खे भाऊ असून त्यांचे कोपरीत रतन सुपर मार्केट नावाचे दुकान आहे. चावला बंधू हे दुकान चालवतात. परंतु महेश हा दुकानातील नोकरासमोर अनिलचा अपमान करत होता. शिवाय इच्छेविरुद्ध दुकानाचे कामकाज करत असल्याचा अनिलच्या मनात राग होता. याच रागातून अनिल याने दुकानातील दोन नोकरांच्या मदतीने दुकानातील जड वस्तूच्या सहाय्याने डोक्यात फटके मारून महेशचा खून केला.
हा प्रकार गुरुवारी दुकानातच घडला होता. परंतु वैद्यकीय अहवालात महेश याची हत्या झाल्याची बाब समोर आल्यानंतर शुक्रवारी रात्री अनिल याच्यासह दुकानातील दोन नोकर अशा एकूण तिघांविरुद्ध कोपरी पोलिस ठाण्यात गुन्हा दाखल करण्यात आला. त्यानंतर रात्री १२ वाजण्याच्या दरम्यान पोलिसांनी तिन्ही आरोपींना अटक केली. या गुन्ह्याचा तपास पोलिस निरीक्षक (गुन्हे) डी. एस. गावडे करत आहेत.