जेनेरिक औषध निर्मितीतील आघाडीची कंपनी असलेल्या हेटेरो लॅबला करोना रुग्णावर उपचार करताना प्रभावी ठरलेलं रेमडेसिविर (remdesivir)औषधाची निर्मिती करण्याची परवानगी मिळाली आहे. भारतीय औषध महानियंत्रकांकडून (डीसीजीआय) ‘कोव्हीड-१९’वरील उपचारासाठी रेमडेसिविर या अन्वेषणात्मक विषाणूरोधी औषधाच्या निर्मिती आणि विक्रीला परवानगी मिळाली आहे, असा दावा, कंपनीने केला आहे.
“देशातल्या करोनाबाधितांची वाढती संख्या पाहता ‘कोविफॉर’(रेमडेसिविर)ला मिळालेली मान्यता तिच्या प्रयोगशाळेतील चाचण्यांचे निष्कर्ष पाहता मोठ्या प्रमाणात चांगले बदल घडवून आणेल, अशी शक्यता आहे. हे उत्पादन देशभरातील ग्राहकांसाठी लगेच उपलब्ध असेल यासाठी आम्ही प्रयत्न करू, असे हेटेरो ग्रुप ऑफ कंपनीचे अध्यक्ष डॉ. बी. पार्थ सारथी रेड्डी यांनी सांगितले. ते म्हणाले की, सध्याची गरज पाहता पुरेसा साठा उपलब्ध असेल याची आम्ही काळजी घेऊ. कोव्हीड-१९ विरोधातील लढ्यात महत्त्वपूर्ण कामगिरी बजावण्यासाठी आम्ही सरकार आणि वैद्यकीय क्षेत्रासोबत सातत्याने काम करत राहू, अशी ग्वाही त्यांनी दिली. केंद्र सरकारच्या ‘मेक इन इंडिया’मोहिमेला धरुन या औषधाची देशांतर्गत निर्मिती करण्यात आली आहे, अशी माहिती त्यांनी दिली.
कोव्हीड-१९ च्या लहान आणि मोठ्या, गंभीर लक्षणांमुळे रुग्णालयात दाखल असलेल्या रुग्णांवर, संशयित किंवा प्रयोगशाळेत सिद्ध झालेल्या रुग्णांवर उपचारासाठी ‘रेमडेसिविर’ या औषधाला डीसीजीआयने मंजुरी दिली आहे. ‘कोविफॉर’ (रेमडेसिविर) १०० मिली ग्रॅमच्या व्हायलमध्ये (इंजेक्शन देण्यायोग्य) उपलब्ध असेल आणि वैद्यकीय तज्ञाच्या निरीक्षणाखाली रुग्णालयात हे औषध देण्याचे निर्देश आहेत. सिप्ला कंपनीलादेखीत या औषधाच्या निर्मितीची परवानगी देण्यात आली आहे.
भारतातील करोनाबाधित रुग्णांनी रेमडेसिविर हे औषध बांगलादेशमधून आयात करण्यास सुरुवात केली आहे. तर दुसरीकडे देशांतर्गत औषध निर्माता कंपन्या या औषधाच्या निर्मितीसाठी परवानगीच्या प्रतिक्षेत आहेत. करोना रुग्णावर उपचार करताना प्रभावी ठरलेलं रेमडेसिविर हे एकमेव औषध आहे. पण भारतात औषध महानियंत्रकांची परवानगीच नसल्यामुळे कंपन्या या औषधाची निर्मिती करू शकत नव्हत्या, आता मात्र मार्ग मोकळा झाला आहे.
अमेरिकेतील रेमडेसिविरची निर्माता कंपनी जिलीड सायन्सेसने मे महिन्यात चार कंपन्यांना परवानगी दिली होती. सिप्लाय, मायलॅन, हिटेरो आणि जुबिलन्ट लाइफ सायन्सेस या चार कंपन्यांना भारतात निर्मिती आणि विक्रीसाठी परवानगी मिळाली आहे. सिप्ला आणि हिटेरोने निर्मिती सुरू करण्यासाठी परवानगीचा अर्ज केला होता. अखेर हिटेरोला परवानगी देण्यात आली. करोनावर उपाय करताना सकारात्मक परिणाम दाखवलेलं रेमडेसिविर हे औषध सध्या बांगलादेशमधून आयात करावं लागत आहे. चार भारतीय कंपन्यांना रेमडेसिविरच्या निर्माता कंपनीकडून निर्मिती आणि विक्रीसाठी परवानगी मिळाली आहे. पण सरकारकडून मात्र अजून परवानगी मिळालेली नाही. त्यामुळे एकीकडे रुग्ण बांगलादेशच्या औषधावर अवलंबून असून कंपन्या परवानगीच्या प्रतिक्षेत आहेत.