अकृषी विद्यापीठांच्या अंतिम वर्षाच्या परीक्षांबाबत ठोस निर्णय होत नसल्याने, सावित्रीबाई फुले पुणे विद्यापीठाने परीक्षा घेण्याबाबत कार्यवाही सुरूच ठेवली आहे. अंतिम वर्षाची परीक्षा रद्द करून, विद्यार्थ्यांना अंतर्गत मूल्यमापन; तसेच मागील परीक्षांच्या आधारे सरासरी गुण देऊन विद्यार्थ्यांना उत्तीर्ण करण्याचा लेखी आदेश अद्याप आलेला नाही. त्यामुळे आदेश येइपर्यंत परीक्षेची तयारी सुरूच ठेवण्याचा निर्णय व्यवस्थापन परिषदेच्या बैठकीत घेण्यात आला आहे.
पदवी परीक्षा न घेता सरसरी गुणांच्या आधारे मूल्यांकन करण्याचे सरकारने जाहीर केले असले तरी अद्याप याबाबत कोणताही शासननिर्णय प्रसिद्ध न झाल्याने विद्यार्थ्यांमध्येही संभ्रम वाढू लागला आहे. आरोग्य विज्ञान विद्यापीठानेही परीक्षांचे वेळापत्रक जाहीर केले आहे. व्यावसासिय अभ्यासक्रमांच्या परीक्षांबाबत परीक्षा घेण्याबाबतच्याही अद्याप स्पष्ट सूचना नाहीत. अंतिम सत्रांच्या परीक्षा मात्र रद्द करण्यात येत असल्याची घोषणा स्वत: मुख्यमंत्री उद्धव ठाकरे यांनी केली आहे. तरीही तसा लेखी आदेश अद्याप न आल्याने पुणे विद्यापीठाने परीक्षेची तयारी करून ठेवण्याचा निर्णय घेतला आहे.
करोनामुळे निर्माण झालेल्या आर्थिक अडचणींच्या पाश्र्वभूमीवर विद्यापीठाच्या अंदाजपत्रकात काही बदल करण्याचा निर्णय व्यवस्थापन परिषदेने घेतला. त्यानुसार येत्या वर्षात विद्यापीठाचे उत्पन्न काही प्रमाणात घटण्याची शक्यता विचारात घेऊन खर्चालाही कात्री लावली जाणार आहे. त्यानुसार विद्यापीठाला खर्च आटोक्यात ठेवण्यासाठी खर्च कमी करण्यात येणार आहेत. त्याचे बदल अंदाजपत्रकात केले जातील, अशी माहिती परिषदेच्या सदस्यांनी दिली.