ठाण्यात एक विचित्र घटना घडली आहे. तोंडावर सिगारेटचा धूर सोडल्यामुळे दोन गटात प्रचंड हाणामारी झाली. गावठी कट्टा रोखत दगडफेकही करण्यात आल्याने एकच खळबळ उडाली आहे. याप्रकरणी पोलिसांनी चार जणांनी अटक केली असून अधिक तपास सुरू आहे.
सोमवारी रात्री वागळे इस्टेटच्या साठे नगरमध्ये ही घटना घडली. एका व्यक्तीने दुसऱ्या व्यक्तीच्या तोंडावर धूर सोडला. त्यामुळे संतापलेल्या व्यक्तीने त्याला जाब विचारला असता शाब्दिक चकमक उडाली आणि त्याचं पर्यावसान हाणामारीत झालं. दोन्ही गट आमनेसामने उभे ठाकले आणि एकमेकांवर जोरदार दगडफेक केली. संतापलेल्या एका व्यक्तीने तर चक्का गावठी कट्टा काढून दुसऱ्या व्यक्तीवर रोखत त्याला जीवे मारण्याची धमकी द्यायला सुरुवात केली. त्यामुळे काही काळ टेन्शन निर्माण झालं होतं. हा सर्व प्रकार सीसीटीव्ही कॅमेऱ्यात कैद झाला आहे.
लॉकडाऊन असतानाही साठे नगरात दगडफेक सुरू असल्याची माहिती पोलिसांना मिळताच वागळे इस्टेट पोलिसांनी तात्काळ घटनास्थळी धाव घेऊन जमावाला पांगवले. याप्रकरणी पोलिसांनी चौघांना अटक करून त्यांच्याविरोधात गुन्हा दाखल केला आहे. दरम्यान, गावठी कट्टा रोखणारा अमर तुसांबर हा तरूण फरार असून पोलीस त्याचा शोध घेत आहे. मात्र, या घटनेमुळे साठे नगरात दहशतीचं वातावरण निर्माण झालं आहे. काल रात्री झालेल्या हाणामारीत काही लोकांना किरकोळ मार लागल्याचं सूत्रांनी सांगितलं.