आजारातून बरी होत असलेल्या गायीचे रक्त लवकर वाढावे म्हणून एका शेतकऱ्याने तिला गाजर खाऊ घातले. मात्र, त्यातून नवीन समस्या निर्माण झाली. गायीचा जीव धोक्यात आला. खासगी पशुवैद्यकानं केलेल्या तातडीच्या उपचारामुळे हा धोका टळला.
अकोले तालुक्यातील एका शेतकऱ्याच्या गायीवर हा प्रसंग ओढावला होता. गाय अजारी असल्याने त्यांनी डॉ. डॉ. संतोष वाकचौरे यांच्याकडून उपचार करून घेतले. उपचारानंतर गाय बरी होत होती. चारा खाऊ लागली होती. तिला श्वास घ्यायला त्रास होत होता. तिच्या अंगातील रक्त कमी झाल्याचे डॉक्टरांनी सांगितले होते. त्यामुळे तिने चारा खायला सुरवात केल्याने शेतकऱ्याने तिला मका, घास सोबत गाजरही खायला दिले. गाजरामुळे रक्त वाढावे, अशी त्याची अपेक्षा होती. मात्र, सायंकाळी गायीची प्रकृती आणखीच बिघडली. लाळ गाळू लागली. गायीला श्वासही घेता येईना. तेव्हा त्यांनी पुन्हा डॉक्टरांशी संपर्क केला. प्रकरण गंभीर असल्याचं लक्षात येताच डॉ. वाकचौरे तातडीने निघाले. दिवसभर चांगली तब्येत झाली असा निरोप देणारा शेतकरी असे का सांगतोय? काय झाले असेल आता त्यांच्या गाईला, नव्याने, असा प्रश्न डॉक्टारांना पडला. ‘डॉक्टर काहीही करा, पण गाय वाचवा, एकच गाय आहे, तिच्या दुधावर आमचे घर चालते.’ शेतकरी विनंती करीत होता.
गाईच्या नाका तोंडातून भरपूर स्त्राव येत होता. मधूनच ठसका येत होता, श्वास घ्यायला त्रास होत होता, पोट फुगलेले दिसत होते. तपासणी करताना गायीला काय खाऊ घातले, हे विचारल्यावर गाजर खाऊ घातल्याचे कळाल्यावर डॉक्टरांना शंका आली. त्यांनी तोंडातून हात घातला, पण काही लागले नाही. मग मानेजवळ तपासून पाहिले. तेथे काही तरी अडकल्याचा संशय होता. मात्र, तिथपर्यंत तोंडातून हात पोहचणे शक्य नव्हते. आणि गाईची प्रकृती पहाता ऑपरेशनही शक्य नव्हते. मग स्नाऊ हलके होण्याचे इंजेक्शन दिले. अन्ननलिका हलकी झाल्यावर मानेजवळ चोळून आत अडकलेली वस्तू तोंडाकडे ढकलण्याचे प्रयत्न झाले. पंधऱा वीस मिनिटांत ती घशापर्यंत आणण्यात यश आले. गायीचे प्रकृती एकदमच बिघडली असल्याने ती स्वत: काहीच करू शकत नव्हती. आता घशातून ती वस्तू काढणे आवश्यक होते. मात्र, तोंडात हात घातला तर दाताखाली चावला जाण्याचा मोठा धोका. त्यामुळे डॉक्टरांनी युक्ती केली. एक पीव्हीसी पाईपचा तुकडा घेऊन तो आधी जबड्यात बसविला आणि त्यातून मग आत हात घातला. घशात अडकलेले गाजराचे तुकडे बाहेर काढले. गाईला जोरदार ठसका आला आणि तिची अन्ननलिका मोकळा झाली. मध्येच अडकलेला चारा बाहेर पडला, एक दोन मिनिटातच फुगलेले पोटही पूर्ववत झाले.