यंदाही रायगडावर छत्रपती शिवाजी महाराजांचा राज्याभिषेक सोहळा पार पडेल. त्यात खंड पडू देणार नाही, असं सांगतानाच शिवभक्तांना रायगडावर येण्याची गरज पडू नये म्हणून त्यांना हा सोहळा थेट लाइव्ह दाखवण्याची व्यवस्था करण्यात येईल, अशी माहिती खासदार छत्रपती संभाजी राजे यांनी दिली.
करोनाच्या पार्श्वभूमीवर येत्या ६ जून रोजी छत्रपती शिवाजी महाराज यांचा राज्याभिषेक सोहळा रायगडावर पार पडेल की नाही, याबद्दल शंका उपस्थित केली जात होती. मात्र छत्रपती संभाजी राजे यांनी ट्विट करून या परंपरेत कोणताही खंड पडू देणार नसल्याचं स्पष्ट केलं आहे. सर्व शिवभक्तांना मी एकच शब्द देतो, की महाराजांचा राज्याभिषेक विधिवत पार पाडला जाईल. त्या परंपरेमध्ये खंड पडू देणार नाही. राजसदरेतील राज्याभिषेक सोहळा सर्व शिवभक्तांना थेट पाहता येईल याविषयी सुद्धा उपाय योजना करण्याचा माझा मानस आहे, असं संभाजी राजे यांनी म्हटलं आहे.
एकच धून ६ जून, असं म्हणत महाराष्ट्राच्या अन् देशाच्या कानाकोपऱ्यातून लाखो शिवभक्त कशाचीही पर्वा न करता दरवर्षी रायगडावर पोहोचत असतात. फक्त महाराजांचा राज्याभिषेक सोहळा डोळ्यांत साठवून घेण्यासाठी हजारो किलोमीटरचा प्रवास करून शिवभक्त गडावर येत असतात. त्यामुळे यंदाही शिवराज्यभिषेक सोहळा घेण्याबाबत गेल्या काही दिवसांपासून मी महाराष्ट्रातील विविध भागांतील शिवप्रेमी, इतिहासकार, शिवराज्याभिषेक महोत्सव समितीचे सदस्य, अनेक दुर्गप्रेमी संस्थांचे सदस्य, संबंधित विविध संघटना, शासकीय अधिकारी, लोकप्रतिनिधी, पत्रकार या सर्वांशी चर्चा करत आहे. निर्णय घेऊन सर्वांना कळवण्यात येईल, असं त्यांनी स्पष्ट केलं आ