औरंगाबादमधील करोनाबाधितांची संख्या काही कमी होताना दिसत नाही. औरंगाबादमध्ये आज पुन्हा १४ नवे करोनाबाधित सापडले आहेत. त्यामुळे औरंगाबाद जिल्ह्यातील करोनाच्या रुग्णांची संख्या १४४वर पोहोचली आहे.
आज औरंगाबादच्या आसेफिया कॉलनी, जयभीम नगर, किलेअर्क, कैलासनगर, नूर कॉलनी, चिकलठाणा आदी भागात १४ नवीन करोनाबाधित सापडले आहेत. यात जयभीम नगरमध्ये सहा तर इतर ठिकाणी प्रत्येकी एक रुग्ण सापडला आहे. त्यामुळे त्यांना तातडीने रुग्णालयात भरती करण्यात आले असून त्यांच्यावर उपचार सुरू करण्यात आले आहेत. तसेच या रुग्णांच्या कुटुंबीयांना आणि शेजाऱ्यांना होम क्वॉरंटाइन करण्यात आले आहे. गेल्या काही दिवसांपासून जयभीम नगर, किलेअर्क, नूर कॉलनी आणि चिकलठाण्यात करोना रुग्ण सापडत असल्याने हे परिसर करोनाचे हॉटस्पॉट ठरले आहेत. त्यामुळे पालिका प्रशासनाने हे परिसर आधीच सील केले आहेत. मात्र, हे सर्व परिसर दाटीवाटीचे असल्याने या परिसरात करोनाबाधितांची संख्या वाढत आहेत. त्यामुळे प्रशासनासमोरची डोकेदुखी वाढली आहे.
त्यामुळे झोपडपट्टी किंवा दाटीवाटीच्या परिसरातील लोकांना संस्थात्मक क्वॉरंटाइन करण्याच्या हालचालीही प्रशासनाने सुरू केल्या आहेत. तसेच या परिसरात औषधांच्या फवारणीवरही भर देण्यात येत आहे. दरम्यान, राज्यातील करोनाबाधितांची संख्या ९९१५वर पोहोचली आहे. त्यापैकी २०५ जणांना डिस्चार्ज देण्यात आला असून आतापर्यंत १५९३ रुग्ण बरे झाले आहेत.