करोनाच्या संसर्गामुळं मुंबई पोलीस दलातील तीन कर्मचाऱ्यांचा मृत्यू झाला असतानाच, आज, बुधवारी मुंबई महापालिकेतील एका अधिकाऱ्याचा करोनाच्या संसर्गामुळं मृत्यू झाला. मुंबई महापालिकेनं ट्विटद्वारे ही माहिती दिली.
अवघ्या देशावर करोनाचं संकट कोसळलं आहे. महाराष्ट्रात सर्वाधिक करोनाबाधित रुग्ण मुंबईत असून, मृतांची संख्याही अधिक आहे. आरोग्य यंत्रणा, महापालिकेचे कर्मचारी-अधिकारी आणि पोलीस यंत्रणा मुंबईकरांच्या सुरक्षिततेसाठी दिवस-रात्र काम करत आहे. करोना विषाणूनं आरोग्य यंत्रणा आणि पोलीस यंत्रणेला विळखा घातला आहे. मुंबईकरांच्या सेवेत असलेल्या पोलीस यंत्रणेबरोबरच महापालिका प्रशासनालाही करोनानं मोठा धक्का दिला आहे. मुंबई महापालिकेतील अॅसेसमेंट डिपार्टमेंटमध्ये कार्यरत निरीक्षकांचा आज करोनाच्या संसर्गामुळे मृत्यू झाला. याबाबत मुंबई महापालिकेनं ट्विट करून माहिती दिली. तसंच त्यांना श्रद्धांजलीही वाहिली.