पालघर ते मुंबई प्रवास करणाऱ्या परिचारिकेला करोनाची लागण झाल्याने पालघरमध्ये खळबळ उडाली आहे. ही परिचारिका पालघरहून मुंबईला जाण्यासाठी ज्या एसटीतून प्रवास करत होती, त्या एसटीतील चालक आणि कंडक्टकरसह सर्वच्या सर्व ११ प्रवाशांना होम क्वॉरंटाइन करण्यात आले आहे. तसेच हे प्रवासी कुणाकुणाच्या संपर्कात आले होते, याचाही शोध घेतला जात आहे.
या परिचारिकेला करोनाची लागण झाल्यानंतर तात्काळ तिच्या संपर्कातील लोकांचा शोध घेण्यात आला. यात तिच्यासोबत प्रवास करणाऱ्यांचा सर्वाधिक समावेश आहे. त्यामुळे या सर्वांचे तातडीने विलगिकरण करण्यात आले आहे. ही ५७ वर्षीय परिचारिका पालघरच्या मिशन कंपाऊंड येथे राहत होती. ही परिचारिका राहत असलेला परिसर पूर्णपणे सील करण्यात आला आहे. पालघरहून मुंबईला प्रवास करणारी ही परिचारिका मुंबई महानगरपालिकेत आरोग्य विभागात कार्यरत असल्याची माहिती पुढे आली आहे.
मुंबई येथे अत्यावश्यक सेवेत काम करणाऱ्यांसाठी पालघर येथून एसटी बसची सुविधा करण्यात आली होती. दररोज पालघर येथून मुंबईला प्रवास करत असल्याने त्यांच्या सोबत प्रवास करणाऱ्या ११ प्रवाशांचे अलगीकरण व घशाच्या नमुन्याची तपासणी पालघरच्या आरोग्य विभागाने सुरू केली आहे. अलगीकरण करण्यात आलेल्यांमध्ये बृहन्मुंबई महानगरपालिकेचे कर्मचारी, बस चालक व कंडक्टर यांचा समावेश आहे.