वसई-विरार महापालिका क्षेत्रात आधीच वाढत असलेल्या करोना रुग्णसंख्येमुळे सर्वत्र भीतीचे वातावरण असताना दोन तरुणांनी दहा रुपयांची नोट घराच्या पायरीवर फेकल्याने नागरिकांमध्ये घबराट निर्माण झाली होती. ही घटना वसई, चोबारे येथे घडली असून या प्रकरणी दोघांवरही वसई पोलिस ठाण्यात गुन्हा दाखल करून अटक करण्यात आली.
वसईतील चोबारे गावातील एका व्यक्तीच्या घराच्या पायरीवर १० रुपयांची नोट दिसून आली. ही नोट नक्की कुठून आली, याबाबत माहिती घेत असतानाच या परिसरातील सीसीटीव्हीमध्ये दोन तरुण ही नोट फेकताना दिसून आले. त्यानंतर येथील एका नागरिकाने या संबंधी लेखी तक्रार वसई पोलिस ठाण्यात दिली. त्यानंतर पोलिसांनी त्या दोघांना ताब्यात घेतले. करोनाचा फैलाव करण्यासाठी त्यांनी हे कृत्य केले असावे का, असा प्रश्न नागरिकांमध्ये निर्माण झाला होता. त्यामुळे या दोन्ही तरुणांवर जीवितास धोकादायक असलेल्या रोगाचा संसर्ग पसरविण्याचा संभव असलेली कृती केल्याप्रकरणी वसई पोलिस ठाण्यात विविध कलमांन्वये गुन्हा दाखल करण्यात आल्याचे वसई पोलिस ठाण्याचे वरिष्ठ पोलिस निरीक्षक अनंत पराड यांनी सांगितले.
चोबारे येथील एका घराच्या पायरीवर या दोन्ही तरुणांनी सर्वप्रथम ही १० रुपयांची नोट फेकली. त्यानंतर हे पाहताच नागरिकांनी वसई पोलिसांना माहिती दिली. पोलिस घटनास्थळी पोहोचले. मात्र पोलिसांच्या मनातही या नोटेबाबत भीती निर्माण झाली होती. त्यांनी ही नोट असुरक्षित असल्याचे मानले. त्यानंतर पोलिसांनी हातमोजे व तोंडाला मास्क लावून या नोटीच्या ठराविक अंतराने दोन काठ्यांच्या साहाय्याने तिला अलगद उचलले, मात्र ती हातात न घेता तिला थेट पिशवीत टाकले व सीलबंद करून पुढील तपासासाठी घेऊन गेले.