देशातील खासगी रुग्णालये बंद असतील तर ती सुरू करण्याचे आदेश त्या-त्या राज्यांनी द्यावेत आणि विविध कारणांसाठी रुग्णालयात येणाऱ्या प्रत्येक नियमित रुग्णांची करोना चाचणी करण्याचा आग्रह धरला जाऊ नये, असे स्पष्ट निर्देश केंद्र सरकारने राज्यांना दिले आहेत.
केंद्रीय आरोग्य मंत्रालयाने विविध राज्यांच्या प्रधान सचिवांना पत्र पाठवून या सूचना केल्या आहेत. करोनाची लागण होऊ शकते या भीतीपोटीस किंवा कर्मचारीवर्ग कामावर येत नसल्याच्या कारणामुळे विविध राज्यांमधील खाजगी रुग्णालये डायलिसीस, रक्तसंक्रमण, केमोथेरपी आणि इतर गोष्टी त्याच्या नियमीत रुग्णांना देणे बंद केले असल्याची माहिती केंद्रीय आरोग्य खात्याकडे आली असल्याचे केंद्रीय आरोग्य मंत्रालयाच्या सचिव प्रीती सुदान यांनी राज्यांच्या प्रधान सचिवांना पाठवलेल्या पत्रात म्हटले आहे.
विविध आजारांच्या नियमीत रुग्णांना ज्या वैद्यकीय सेवेची गरज आहे, अशांना ती देणे अत्यंत आवश्यक असून ती न मिळाल्याने रुग्णांचे हाल होऊ शकतात, म्हणून अशा सेवा पुरवल्या गेल्यात पाहिजे असे सुदान यानी पत्रात म्हटले आहे.
नियमीत रुग्णांना सेवा देण्यापूर्वी त्यांना करोना चाचणीचा आग्रह धरू नये असे जरी केंद्रीय आरोग्य मंत्रालयाने म्हटले असले, तरी वैद्यकीय सेवा पुरवणाऱ्यांनी आपल्या स्वत:च्या सुरक्षेची सर्वतोपरी काळजी घ्यावी असा सल्ला त्यांना देण्यात आला असल्याचेही सुदान यांनी आपल्या पत्रात म्हटले आहे.
सुदान यांनी या पत्रात केंद्रीय आरोग्य मंत्रालयाने २० एप्रिल या दिवशी जारी केलेल्या गाइडलाइन्सचाही उल्लेख केला आहे. यांमध्ये गरोदर स्त्रिया, बालकांसाठीच्या वैद्यकीय गरजा, लसीकरण, कर्करोग आणि मूत्रपिंडाच्या आजारावर उपचार सुरू असले पाहिजेत असे म्हटले आहे.