करोनाचा प्रादुर्भाव वाढू नये म्हणून नागरिकांना बाहेर न पडण्याचे आवाहन केले जाते. तरीही नागरिक काहीही कारण काढून बाहेर पडत आहेत. समर्थ पोलिस ठाण्याच्या हद्दीत करोनाचा हॉटस्पॉट असलेल्या भागात खारी आणण्यासाठी बाहेर पडलेल्या तरुणाला पोलिसांनी चांगलीच अद्दल घडविली. त्याला चक्क डझनभर केळी खाण्याची शिक्षा करण्यात आली. त्याच्या शिक्षेचा व्हिडिओ सोशल मीडियावर धुमाकूळ घालत आहे.
शहरात करोनाचा प्रादुर्भाव वाढत आहे. त्यावर नियंत्रण मिळविण्यासाठी पोलिस, आरोग्य विभाग, जिल्हा प्रशासन काम करत आहे. करोनाचा संसर्ग वाढू नये म्हणून नागरिकांना विनाकारण बाहेर पडू नये, असे आवाहन केले जाते. तरीही नागरिक नियमांचे उल्लंघन करत आहेत. त्यामुळे पोलिसांकडून विनाकारण फिरणाऱ्या नागरिकांवर कारवाई केली जात आहे. नागरिकांकडून व्यायाम करवून घेणे, उठाबशा करायला लावणे, सूर्यनमस्कार करण्यास सांगणे आणि गुन्हे दाखल करणे अशा शिक्षा दिल्या जात आहेत. तरीही काहीजण बाहेर पडत आहेत. समर्थ पोलिस ठाण्याच्या हद्दीत काही ठिकाणी करोनाचे हॉटस्पॉट आहेत. त्या परिसरात एक तरुण सकाळी खारी आण्यासाठी बाहेर पडला होता. पोलिसांनी विचारपूस केल्यानंतर त्याने खारी आणण्यास जात असल्याचे सांगितले, तेव्हा पोलिसांनी कपाळाला हात लावला. त्याची खोड मोडण्यासाठी पोलिसांनी त्याला एक डझनभर केळी खायला लावली. त्याला दिलेल्या शिक्षेचा व्हिडिओ सोशल मीडियावर व्हायरल झाला होता. नागरिकांनी नियम न पाळल्यास त्यांच्यावर कारवाई केली जाईल, असे पोलिसांकडून स्पष्ट करण्यात आले आहे.