करोनाच्या प्रादुर्भावानुसार केलेल्या विविध झोननुसार २० एप्रिलपासून जीवनावश्यक वस्तूंसोबत इतर बाबींना सवलत मिळणार असल्याने व्यापारी वर्गाने आस्थापने सुरू करण्याबाबत तयारी केली होती, काहींनी दुकाने सुरूही केली. मात्र नगर परिषदेने तात्काळ ही सर्व दुकाने बंद केली. पालघर जिल्हा ‘रेड झोन’मध्ये येत असल्याने येथे कोणतीही सवलत मिळणार नाही, हे स्पष्ट झाले आहे.जव्हार-मोखाडा हा ग्रामीण भागात येत असल्याने येथे शेतीसंबंधी कामे, खते, कीटकनाशके यांची दुकाने, शेती साहित्य, मत्स्य व्यवसाय, ग्रामीण भागातील उद्योग, रस्ते काम, सिंचन प्रकल्प, मनरेगा, धाबे, गॅरेज कामे इत्यादी बाबी सुरू होणार होते. मात्र पालघर जिल्हा हा ‘रेड झोन’मध्ये येतो. त्यामुळे ज्या ठिकाणी रेड झोन आहे, त्या ठिकाणी इतर कुठलीही सवलत दिलेली नाही.दरम्यान, ग्रामीण भागात कोणती कामे सुरू करायची किंवा नाही, त्यांची परवानगी कशी काढायची, याबाबत जिल्हाधिकाऱ्यांकडून दुपारपर्यंत नवीन कुठलीच नियमावली आलेली नाही. त्यामुळे पुढे काय करायचे, अशा संभ्रमात जव्हारवासी पडले आहेत. जव्हार तालुक्यात करोनाचा एकही रुग्ण नाही. त्यामुळे येथे सूट मिळेल, अशी आशा व्यापारी वर्गाला होती. मात्र ती प्रत्यक्षात आली नाही. त्यामुळे नागरिकांनी जिह्यातील ‘रेड झोन’मुळे आम्हाला वगळून ‘ग्रीन झोन’मध्ये टाकावे, अशी मागणी जोर धरत आहे.