मुंबईत हातपाय पसरलेल्या करोनाचा आरोग्य कर्मचाऱ्यांनाही धोका निर्माण झाला आहे. करोनाच्या रुग्णांवर उपचार करणाऱ्या आरोग्य कर्मचाऱ्यांनाही करोनाची लागण होत असल्याने चिंता व्यक्त केली जात आहे. पालिकेच्या चर्चगेट येथील कान, नाक आणि घशाच्या दवाखान्यात १३ कामगारांना करोनाची लागण झाली असून शिवडीच्या टीबी रुग्णालयात एक डॉक्टर आणि वॉर्डबॉयलाही करोनाची लागण झाल्याचं आढळून आलं आहे.
रविवारी टीबी रुग्णालयातील एक डॉक्टर आणि वॉर्डबॉयला करोनाची लागण झाली आहे. त्यानंतर या रुग्णालयातील १० डॉक्टरांना क्वॉरंटाइन करण्यात आलं आहे. यापूर्वी या रुग्णालयातील एका वॉर्डबॉयला करोनाची लागण झाली होती. त्यामुळे रुग्णालयातील ७० जणांना क्वॉरंटाइन करण्यात आलं होतं. गेल्या ४ दिवसांत रुग्णालयात ३ जणांना करोनाची लागण झाल्याचं समोर आलं आहे. त्यामुळे ८० लोकांचं विलगीकरण करण्यात आलं होतं. एवढ्या मोठ्या प्रमाणावर स्टाफला क्वॉरंटाइन करण्यात आल्याने रुग्णसेवेवर परिणाम होत असल्याच रुग्णालयाचे अधिष्ठाता डॉ. ललित आनंदे यांनी सांगितलं.
तर चर्चगेटमधील पालिकेच्या कान, नाक आणि घसा रुग्णालयात १३ कर्मचाऱ्यांना करोनाची लागण झाली आहे. या रुग्णालयात आधीपासून करोनाच्या रुग्णांवर उपचार करण्यात येत आहे. रुग्णालयातील काही कर्मचाऱ्यांमध्ये करोनाची लक्षणे आढळल्यावर त्यांच्यावर उपचार करण्यात आले. त्यात १३ कर्मचारी पॉझिटिव्ह आढळून आल्याचं रुग्णालयाच्या अधिष्ठाता डॉ. दीपिका माने यांनी सांगितलं. मुंबईत आतापर्यंत २७५ आरोग्य कर्मचाऱ्यांना करोनाची लागण झाली आहे. त्यात नर्सेसची संख्या सर्वाधिक आहे. आकडेवारीनुसार वोकहार्टनंतर जसलोक आणि भाटिया रुग्णालयातील कर्मचाऱ्यांना सर्वाधिक लागण झाल्याचं दिसून आलं आहे, अशी माहिती सूत्रांनी दिली.