उत्तर कोरियाचे अध्यक्ष किम जोंग उन यांची मृत्यूशी झुंज सुरू असल्याचे वृत्त समोर आले आहे. त्यांच्या हृदयावर काही दिवसांआधी शस्त्रक्रिया पार पडली होती. मात्र, त्यानंतर किम जोंग यांची प्रकृती खालावत असल्याचे वृत्त आहे. किम जोंग यांच्या प्रकृतीबाबतच्या वृत्तामुळे जगभरात खळबळ उडाली आहे.
अमेरिकन गुप्तचर संस्था उत्तर कोरियातील घडामोडींवर लक्ष ठेऊन आहेत. एका अमेरिकन अधिकाऱ्याने सांगितले की, किम यांची प्रकृती मागील काही महिन्यांपासून ठिक नव्हती. लठ्ठपणाचा त्यांना त्रास होता. त्याशिवाय अति धुम्रपानाच्या आहारी ते गेले होते. किम हे ११ एप्रिल रोजी दिसले होते. इतकंच नव्हे किम यांचे आजोबा आणि उत्तर कोरियाचे दिवंगत नेते किम उल संग यांच्या जयंतीनिमित्त होणाऱ्या १५ एप्रिलच्या कार्यक्रमात त्यांची अनुपस्थिती होती. किम यांची प्रकृती चिंताजनक असल्याची माहिती या अधिकाऱ्याने दिली.
उत्तर कोरियाच्या घडामोडींचे विश्लेषक ब्रूस क्लिंगर यांनी सांगितले की, मागील काही महिन्यांपासून किम यांच्या प्रकृतीबाबत चर्चा सुरू होती. किम १५ एप्रिलच्या कार्यक्रमात अनुपस्थित असतील याचा अर्थ ते रुग्णालयात असतील असा अंदाज व्यक्त करू शकतो. याआधी किम यांचे वडिल किम जोंग इल यांच्याबाबतही अशाच प्रकारच्या चर्चा सुरू होत्या. उत्तर कोरियाच्या ६० व्या वर्धापन दिनानिमित्त ते गैरहजर होते. त्यावेळी ही उलटसुलट चर्चा सुरू होत्या. मात्र, त्यावेळी त्यांना हृदयविकाराचा झटका आला असल्याचे समोर आले होते. अखेर किम जोंग इल यांचे २०११ मध्ये निधन झाले. त्यानंतर किम जोंग उन यांच्या हाती उत्तर कोरियाच्या सत्तेची सूत्रे आली.